नेविसंघ र तरुण दलको भोलिको भेलाबारे कोइरालानिवासमा रणनीतिक छलफल

१३ चैत, काठमाडौं । नेपाल विद्यार्थी संघ र नेपाल तरुण दलको अध्यक्ष नियुक्तिको विषयमा असन्तुष्टि जनाउँदै छुट्टै राष्ट्रिय भेला बोलाएको नेपाली कांग्रेसको संस्थापनइतर समूहले भेलालाई सफल बनाउनेदेखि यसपछिका रणनीतिका विषयमा छलफल गरेको छ ।

आइतबार इतर समूहका नेता,डा.शेखर कोइरालानिवासमा भएको छलफलमा भोली सोमबार काठमाडौंमा आयोजना गर्न लागिएको नेविसंघ र दरुण दलको राष्ट्रिय भेलालाई पार्टीमा सहअस्तित्व र एकतालाई मजबुत बनाउँदै आगामी निर्वाचनमा कांग्रेसलाई कसरी विजय हासिल गराउने भन्ने विषयमा केन्द्रित बनाउने निष्कर्स निकालिएको छ ।

आज विहान भएको छलफलबारे जानकारी दिँदै नेपाली कांग्रेसका युवा नेता मनोजमणी आचार्यले भोलीको भेला ऐतिहासिक हुने बताए । उनले देशभरीका युवा नेता र विद्यार्थी नेताहरुको उपस्थिति गराएर सभापति शेरबहाददुर देउवाले यस अघि गरेको निर्णयसहित आगामी पार्टीका कामकारवाहीहरुमा सहअस्तित्व र सहमतिलाई कायम राखेर अगाडी बढ्न दवाव दिने बताए ।

केन्द्रीय स्तरका नेताहरुले केन्द्रीय स्तरमा र सो भन्दा तलका नेता तथा कार्यकर्ता स्थानीय तहबाट दवाव सिर्जना गर्ने गरी रणनीति बनाइएको छ । आइतबार हुने भेला कांग्रेसमा एकता, सहअस्तित्व र आगामी निर्वाचनमा धेरै भन्दा धेरै सिट कसरी जित्ने भन्नेमै केन्द्रित हुने नेताहरुले बताएका छन् ।

कोइराला समुहले केन्द्रदेखि वडा तह सम्मै संस्थापन पक्षलाई दवावमा राखेर कार्यक्रम अगाडी बढाउन जनाएको छ । जारी पार्टीको केन्द्रीय समितिको बैठकमा पनि नेताहरुले कांग्रेसलाई विधान र विधिबाट सञ्चालन गर्नुपर्नेमा जोड दिँदै आएका छन् ।