विदेशमन्त्री वाङले उठाए भूराजनीतिक खेलको विषय, नेपाली पक्ष मुखामुखमै सीमित

१३ चैत, काठमाडौं । नेपाल भ्रमणमा रहेका चिनियाँ विदेशमन्त्री वाङ यी चीन नफर्कदै उनले नेपाली प्रतिनिधिहरुसँग उठाएका बिषयहरुको चीनभरी चर्चा सुरु भएको छ । चिनियाँ सञ्चारमाध्यामहरुले वाङको नेपाल भ्रमण नेपालबाट हुनसक्ने भूराजनीतिक खेल वा कुनै पनि गतिविधि चीनका लागि स्वीकार्य नहुने विषयमा केन्द्रित रहेको बताएका छन् ।

चीनको सरकारी सञ्चारमाध्याम ग्लोबल टाइम्सले नेपालले हालै पारित गरेको एमसीसी नेपालबाट चीनमाथि हुनसक्ने भूराजनीतिक गतिविधिको एक अस्त्र हुनसक्नेप्रति चीन सरकार सचेत रहेको वाङको भनाई उल्लेख गरेको छ । तर, एमसीसीका विषयमा कुनै भेटमा नेपाल पक्षले कुरा नउठाएको र वाङलाई प्रष्ट नपारेको बताइन्छ ।

विदेशमन्त्री वाङ यीले नेपाल भ्रमणको क्रममा राष्ट्रपति विद्यादेवी भण्डारी, प्रधानमन्त्री शेरबहादुर देउवा, परराष्ट्रमन्त्री डा. नारायण खड्का, नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटवार्ता गरी स्वदेश फर्कने तयारी रहेका छन् । यी कुनै पनि भेटवार्तामा चीनले चासोका साथ हेरिरहेको एमसीसी परियोजना किन स्वीकार गरियो र यसबाट चीनलाई कुनैपनि खतरा छैन भन्ने कुरा भने उठेन् ।

चीनका परराष्ट्रमन्त्री वाङ र नेपालका परराष्ट्रमन्त्री खड्काबीच भएको नौ बुँदे सहमतिमा पनि बीआरआईसँग सम्बन्धित आयोजनाहरु कहिले र कसरी अगाडि बढ्छन् भन्ने विषयमा गहन छलफल भएन । नाम मात्र बीआरआई र यससँग सम्बन्धित आयोजनाहरु भनेर उठाइएको छ । बीआरआई र चीन सरकारप्रति बढी चासो राख्ने ओली र प्रचण्डले पनि यो विवषयलाई भेटमा उठाउन सकेनन् । एमसीसीका विषयमा झन् उनीहरुले उठाउने कुरै भएन ।

यता, चिनियाँ स्टेट काउन्सिलर समेत रहेका वाङ यीले नेपालको सार्वभौमसत्ता, स्वाधीनता,आत्मनिर्णय तथा आन्तरिक मामिलामा दखल दिएर भूराजनीतिक खेलमा बाह्य शक्तिको संलग्नताको चीनले सख्त विरोध गर्ने उनको भनाइलाई ग्लोबल टाइम्सले उल्लेख गरेको छ ।

उसले चीन सरकार नेपाललाई विकासमा सधैं सहयोग गर्न तयार रहेको र दलहरूलाई नेपालको दीर्घकालीन चासो र नेपाली जनताको हितका पक्षमा काम गर्न चीन प्रोत्साहन गर्दछ भन्दै नेपालको स्वाधीन आन्तरिक तथा विदेश नीतिलाई समर्थन गर्ने जनाएको छ ।

वाङले नेपाल चीन र दक्षिण एसियाली राष्ट्रहरूबीचको सम्बन्धको सेतु बन्नुपर्नेमा जोड दिदैं नेपालले अन्य देशहरूसँग पनि पारस्पारिक सह–अस्तित्व र मैत्रीपूर्ण सम्बन्ध विकास गर्दै क्षेत्रीय र अन्तर्राष्ट्रिय मामिलामा भूराजनीतिक खेलको सीमालाई नियन्त्रण गर्ने विश्वास राखेका छन् ।