काम नगर्ने जनप्रतिनिधि फेरी दोहोरिनुको अर्थ र औचित्य छैनः अध्यक्ष तिमिल्सिना

१३ चैत,काठकाडौं ।  राष्ट्रिय सभाका अध्यक्ष गणेशप्रसाद तिमिल्सिनाले पहिलो कार्यकालमा जनहित र विकास निर्माणका काम अगाडी बढाउन नसक्ने जनप्रतिनिधिले अहिलेकोे स्थानीय तहको निर्वाचनमा पुनःदोहोरिने इच्छा  देखाउनु गलत हुने बताएका छन् ।

उनले स्थानीय तहमा दोहोरिन चाहने जनप्रतिनिधिहरूले आफुले नेतृत्व गर्दा देश र जनताका आवश्यकता अनुसार काम गर्न सकेनसकेको र उनीहरुको आवश्यकतालाई अब कसरी पुरा गर्ने भन्ने विषयमा सोच्न आवश्यक भएको बताए ।

आइतबार गाउँपालिका राष्ट्रिय महासंघ नेपालले आयोजना गरेको कार्यक्रममा अध्यक्ष तिमिल्सिनाले जनप्रतिनिधिहरूले दोहोरिने इच्छा देखाएर मात्रै नहुने र उसमा काम गर्ने क्षमता पनि हुनपर्ने बताए । पहिलो कार्यकालमा असफल भएको जनप्रतिनिधिले आउने कार्यकालमा काम गर्न सक्छ भन्ने ग्यारेन्टी नहुने उनको भनाई छ ।

पदमा दोहोरिने भन्दा पनि आगामी दिनमा के राम्रो काम गर्ने भन्ने विषय महत्वपूर्ण भएको उनले बताए । दोहोरिने चाहना प्रतिनिधिले किन र केका लागि दोहोरिन चाहेको हो स्पष्ट हुनुपर्ने बताए । अध्यक्ष तिमिल्सिनाले आफ्नो पालिका र समाजलाई यस्तो बनाउँछु भन्ने अठोट नगरिकन दोहोरिनुको अर्थ नभएको बताए । उनले अबको स्थानीय सरकारले आम नागरिकको जनजीवनमा परिवर्तन ल्याउन सक्नुपर्ने बताए ।