कोइराला पक्षले बोलाएको नेविसंघ र तरुण दलको राष्ट्रिय भेला आज, कार्यक्रम जुधेकाले नेताहरु दवावमा

१४  चैत, काठमाडौं ।  नेपाली कांग्रेस संस्थापनइतर (कोइराला) समूले सोमबार काठमाडौंमा आफु पक्षीय नेपाल विद्यार्थी संघ र नेपाल तरुण दलको राष्ट्रिय भेला बोलाएको छ । भेला आज दिउसो अनुपन फुड्ल्याण्डमा हुनेछ ।

उता, सानेपामा जारी कांग्रेसको केन्द्रीय कार्यसमितिको बैठकलाई पनि आजै समापन गरिदैछ । कोइराला समूहे डाकेको भेला र केन्द्रीय समितिको बैठक समापन गर्ने समय संगसगै परेकाले कोइराला पक्षका नेताहरु दवावमा देखिएका छन् ।

पार्टी सभापति शेरबहादुर देउवाले आपसमा सहमति, सहकार्य र पार्टीलाई एकताबद्ध बनाउँदै सबैमा सहअस्तित्व कायम गरेर जाने सहमति विपरित बिना परामर्श नेविसंघ र तरुण दलमा अध्यक्ष नियुक्ति गरेको विरोध स्वरुप आजको भेला बोलाइएको हो ।

नेताहरुकाअनुसार राष्ट्रिय भेलालाई पार्टीमा सहअस्तित्व र एकतालाई मजबुत बनाउँदै आगामी निर्वाचनमा कांग्रेसलाई कसरी विजय हासिल गराउने भन्ने विषयमा केन्द्रित बनाइनेछ । भेलालाई प्रभावकारी र दवावमूलक बनाउनेबारे कोइरालानिवासमा दिनहुँ जासो छलफल हुदै आएको छ ।

कोइरालानिवासमा भएका छलफलमा आजको भेलालाई ऐतिहासिक बनाउने र देशभरीका युवा नेता र विद्यार्थी नेताहरुको उपस्थिति गराएर सभापति शेरबहाददुर देउवाले यस अघि गरेको निर्णयसहित आगामी पार्टीका कामकारवाहीहरुमा सहअस्तित्व र सहमतिलाई कायम राखेर अगाडी बढ्न दवाव दिने उदेश्य राखिएको छ ।

केन्द्रीय स्तरका नेताहरुले केन्द्रीय स्तरमा र सो भन्दा तलका नेता तथा कार्यकर्ता स्थानीय तहबाट दवाव सिर्जना गर्ने गरी रणनीति बनाएका छन् । आज हुने भेला कांग्रेसमा एकता, सहअस्तित्व र आगामी निर्वाचनमा धेरै भन्दा धेरै सिट कसरी जित्ने भन्नेमै केन्द्रित हुने नेताहरुले बताएका छन् ।

कोइराला समुहले केन्द्रदेखि वडा तह सम्मै संस्थापन पक्षलाई दवावमा राखेर कार्यक्रम अगाडी बढाउन जनाएको छ । जारी पार्टीको केन्द्रीय समितिको बैठकमा पनि नेताहरुले कांग्रेसलाई विधान र विधिबाट सञ्चालन गर्नुपर्नेमा जोड दिँदै आएका छन् ।