बजेटबारे छलफल गर्न बोलाएको बैठक कोरम नपुगेपछि स्थगित

१४  चैत, काठमाडौं ।  अर्थ मन्त्रालयले आगामी आर्थिक वर्षको बजेट तयारीका क्रममा विभिन्न पक्षसँग राय सुझाव माग गरेपछि यसै विषयमा छलफल गर्न प्रतिनिधि सभा अन्तर्गतको अर्थ समितिले ठाकेका दुई बैठक कोरम नपुगेर स्थगित भएका छन् ।

समिति लामो समयदेखि सुस्त अवस्थामा छ । देशको आर्थिक क्षेत्रका विभिन्न पक्षमा भइरहेका गतिविधिबारे छलफल गरी सरकार र सम्बन्धित पक्षलाई कार्यन्वयनका लागि निर्देशन गर्नुपर्ने र नीति नियममा जोड दिनुपर्ने समितिको काम हो ।

अर्थ समितिले आज अर्थमन्त्रालय र राष्ट्रिय योजना आयोगसँग बजेटमाथि छलफल गर्न भन्दै बैठक बोलाएको थियो । तर, समितिमा रहेका अधिकाम्स सांसदनै नभएपछि बैठक स्थगित गर्नुपरेको हो ।

बजेटमाथिको छलफल गर्न अर्थ समिति जान लागेका अर्थ मन्त्रालय र योजना आयोगका प्रतिनिधिहरु प्नि फर्किएका छन् । सांसदहरु न्यून उपस्थित भएपछि बैठक बस्न नसक्ने अवस्था आएको समितिका सचिव सुरेन्द्र अर्यालले बताए ।

समितिका कूल सदस्य संख्याको ५१ प्रतिशत उपस्थित भएमात्र बैठक बस्न सक्छ । तर, अहिले प्राय सबै सांसदहरु जिल्ला गएका छन् । नेपाली कांग्रेसको केन्द्रीय समिति चलिरहेकाले पनि उसका सांसद उपस्थित भएनन् ।