संख्या नपुगेर सुनुवाइ नहुँदा रोकिए सर्वोच्चमा प्रस्तावित न्यायाधीश श्रेष्ठ

१४ चैत, काठमाडौं ।  न्याय परिषदबाट सर्वोच्च अदालतका लागि न्यायाधीशमा सिफरिस भएका विराटनगर उच्च अदालतका मुख्य न्यायाधीश तिलप्रसाद श्रेष्ठ संसदीय सुनुवाइ समितिको बैठक बस्न नसक्दा अलमलमा परेका छन् ।

सिफारिस विवादीत भएको भन्दै विपक्षीहरुले सुनुवाइबाट नाम फिर्ता हुने बताइरहेका बेला श्रेष्ठका विषयमा समितिले कुनै निर्णय गर्न सकेको छैन । यसको मुख्य कारण हो समितिको बैठकनै बस्न नसक्नु ।

संसदीय सुनुवाइ समितिका सभापति लक्ष्मणलाल कर्णका अनुसार बैठक कोरम नपुगेर नबसेको हो । सर्वोच्च अदालतका लागि प्रस्तावित न्यायाधीश श्रेष्ठको सुनुवाइ आइतबारका लागि तोकिएको थियो । तर, समितिमा भएका सांसद नभएपछि बैठक बसेन ।

श्रेष्ठको नाम सुनुवाइका लागि संसदीय समितिमा पुगेपछि समितिले फागुन ३० मा श्रेष्ठविरुद्ध कुनै उजुरी भए १० दिनभित्र पेस गर्न सार्वजनिक सूचना जारी गर्ने निर्णय लिएको थियो । संसदीय सुनुवाइ कार्यविधिअनुसार उजुरी आह्वानका लागि तोकिएको १३ दिन वितेको छ ।

चैत ११ गते उजुरी आह्वानको दस दिन सकिएको हो । समितिका सदस्यहरू जिल्लाजिल्लामा पुगेकाले कोरम पुग्न नसकेकाले अर्को बैठक मंगलबार बोलाइएको छ । तर, मंगलबार पनि कोरम पुग्ने सम्भावना भने छैन ।