अहिलेको गठबन्धनलाई कायम राखेर माओवादीले चुनावमा रेकर्ड तोड्छः प्रचण्ड

१४ चैत, काठमाडौं ।  नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी निर्वाचनमा गठबन्धन कायमै राखेर माओवादीले नयाँ रेकर्ड कायम गर्ने बताए का छन् ।

उनले अहिले गठबन्धनमा रहेका दलहरु मिलेर जानुको विकल्प नभएको बताए । रोल्पामा निर्माण भएको भ्यु टावरको उद्घाटन गर्दै उनले रोल्पाले ध्वंशमा मात्र होइन, निर्माणमा पनि कीर्तिमान कायम गर्न सक्ने बताए ।

प्रचण्डले सशस्त्र विद्रोहका क्रममा आफूले आधार इलाकाहरुमा धेरै समय बिताएको बताए । सशस्त्र विद्रोहको पछिल्लो २ वर्ष आफूले रोल्पा रुकुममा बिताएको र १२ बुँदे समझदारी गर्न रोल्पाबाटै गएको प्रचण्डले उल्लेख गरे ।

उनले गतवर्ष प्रतिगमन भएर संविधानका परिवर्तन उल्टिने हो कि भन्ने लागेर गठबन्धन बनाएर सरकार बनाएको बताए । गठबन्धन टुटाउन धेरै चलखेल भइरहेको भन्दै उनले फेरि पनि हामी १२ बुँदेका सहयात्री दृढताको साथ गठबन्धन कायम राख्ने र निर्वाचनमा पनि रेकर्ड बनाएर जानुपर्छ भन्ने मान्यता रहेको बताए ।

प्रचण्डले अहिले रोल्पामा विकासका काम भइरहेको र रोल्पा राम्रो पर्यटकीय गन्तव्य बन्नसक्ने बताए । पर्यटनलाई प्रोत्साहन गर्ने र प्यूठानको स्वर्गद्वारीसँग जोड्न सक्ने हो भने रोल्पा राम्रो पर्यटकीय गन्तव्य बन्नसक्ने प्रचण्डको भनाई छ ।