देउवाको कोइरालालाई जवाफ, ‘हिजो गठबन्धन नगर्दा तपाई हार्नु भो, मैले पनि बालबाल जितेको हुँ’

१४ चैत, काठमाडौं । नेपाली कांग्रेसको केन्द्रीय समिति बैठकमा सभापति शेरबहादुर देउवा र १४ औँ महाधिवेशनमा सभापतिमा प्रत्यासी डा शेखर कोइरालाबीच सवाल जवाफ भएको छ । शेखर कोइरालाले गठबन्धन किन, केका लागि गर्ने भन्दै प्रश्न उठाएर त्यसको जवाफ कार्यकतालार्य दिन भनेपछि देउवा सवाल जवाफमा उत्रिएका हुन् ।

नेता कोइरालाले चुनावी गठबन्धन किन र केका लागि भनेर प्रश्न उठाउँदै सभापतिले कार्यकर्ताको मनोवल गिराउने काम गरेको आरोप लगाएका थिए । “किन गर्ने र केका लागि गठबन्धन गर्ने ? रुष्ट कार्यकर्तालाई सम्बोधन नगरी कसरी अघि बढ्नुहुन्छ ?,” प्रश्न गर्दै शेखरको भनाइ थियो ।

कोइरालाले,“सभापतिले नै एमाले बलियो छ भनेपछि कार्यकर्ताको मनोबल कसरी माथि उठाउन सकिन्छ ?” अहिले सभापतिको प्रस्तुति कांग्रेसको नीति र सिद्धान्तलाई नै तिलाञ्जली दिएर स्वार्थमा लागेको देखिएको भन्दै प्रश्न उठाएका थिए ।

शेखरको प्रश्नपछि देउवाले अगाडि थपे, “अहिले माओवादीलाई बोक्यो भन्ने ? हिजो गठबन्धन नगर्दा तपाईंहरू पनि हार्नु भएको हैन ? म पनि बालबाल जितेको हुँ नि ।” उनले शेखरलाई हिजो पनि यसरी नै बोलेका कारण गठबन्धन नभएको आरोप लगाए । “हिजो पनि तपाईंहरूले यसरी नै बोलेर गठबन्धन बन्न नसकेको होइन ?,” देउवाले भने, “कांग्रेसको नीति सिद्धान्तका बारेमा मलाई नसिकाउनुस् । म कांग्रेसका लागि जीवन काटेको मान्छे हुँ ।”

शेखर बोलेलगत्तै गृहमन्त्रीसमेत रहेका केन्द्रीय सदस्य बालकृष्ण खाँणले समय लिएका थिए । उनले गठबन्धन सरकार बन्ने बेलामा नै तीनवटै तहको निर्वाचनमा गठबन्धन गर्ने सहमति भएको भन्दै कांग्रेसलाई सहमतिबाट च्युत गराउने प्रयास नगर्न आग्रह गरेका थिए ।

“सरकार बन्ने बेलामै तीनै तहको चुनावमा गठबन्धन हुने भनिएको थियो । त्यो सहमति कांग्रेसले तोड्न हुँदैन,” खाँणले गठबन्धनका नाममा आफ्नो संगठन अलग–थलग पार्न पनि नहुँने बताए ।

खाँणले बोलिकसकेपछि सभापति देउवा आफैं शेखरलाई जवाफ दिन उत्रिएका थिए । “म कांग्रेसको सिद्धान्त कसरी तोड्छु ?”, देउवाले शेखरलाई प्रश्न गर्दै भने, “माओवादीलाई मैले ल्याएको हो ? हिजो गरिजाबाबुलाई प्रश्न गर्न सक्नुभयो ?।”