देउवाको केन्द्रीय समितिमा ब्रिफिङः ‘मेरो आइडोलोजीमा शंका नगर्नू, गठबन्धन नगरी हुँदैन’

१४ चैत, काठमाडौं । नेपाली कांग्रेसका सभापति शेरबहादुर देउवाले देशको राजनीतिक अवस्था र सरकारको नेतृत्व गर्दा भएको सहमति अनुसार गठबन्धनमा जानुपर्ने बताएका छन् । उनले केन्द्रीय समितिको बैठकमा आफ्नो धारण राखने क्रममा कांग्रेस एक्लै चुनावमा जाँदा परिस्थिति विग्रने बताए ।

०७४ सालको संसदीय निर्वाचनमा एक्लै प्रतिस्पर्धा गर्दा थोरै ठाउँमा मात्र जित हासिल भएको भन्दै अबको चुनावमा गठबन्धन गरेरै जानुपर्नेमा उनले जोड दिए । कम्युनिष्टसँग अहिले गठबन्धन नगरी जाने निर्णय गर्दा भोली राजनीतिले अर्को मोड लिएको अवस्थामा कांग्रेसलाई चुनवा जित्न गाह्रो हुने देउवाको भनाई छ ।

केन्द्रीय कार्य समिति बैठकमा शेखर कोइरालासहितका केही नेताले गठबन्धनको विपक्षमा धारणा राखेपछि सभापति देउवाले गठबन्धन गरेर जाँदा नै सहज हुने बताएका हुन् । विगतमा माओवादीले आफूलाई समेत गोली हानेको प्रसंग निकाल्दै देउवाले पुराना कुरा भुलेर माओवादीसँग गठबन्धन गरेर नै अघि बढ्नुपर्ने बताए ।

उनले भने, ‘मेरो आइडोलोजीमा शंका नगर्नुहोस्, धेरै लडेको मान्छे हुँ, म अब फेरि पार्टी सभापति हुने होइन, अहिलेको अवस्था त हेर्नु प¥यो नि ।’ सभापति देउवाले आफ्नो सिद्धान्तमा शंका नगर्न केन्द्रीय सदस्यहरुलाई आग्रह गरे । उनले जारी केन्द्रीय समितिको बैठकलाई सम्बोधन गर्दै यस्तो बताएका हुन् ।

“मेरो आइडियोलोजीमा शंका नगर्नुस्,” उनको भनाइ थियो, “म धेरै लडेको मान्छे हुँ । म अब पार्टी सभापति हुने होइन । तपाईंहरु जो जो हुने हो हुनुहोस्,” उनको भनाई थियो ।

“गठबन्धन नहुँदा मैले नै बालबाल जितेको हुँ यार ! गठबन्धन नगरेर हुन्छ ? गठबन्धन गरेर जाँदा हामी सबैले जित्छौँ भन्या । ए बाबा ! पहिला धेरै साथीहरु हारेका होइनन् र ? मलाई पनि माओवादीले गोली हानेकै हुन् नि ! पुराना कुरा सम्झेर हुन्छ र ? त्यसकारण गठबन्धन गरेर जाऔँ ।”