विवेकशील साझाको असन्तुष्ट समूहले अध्यक्ष मिश्रसँग स्पष्टीकरण सोध्ने

१४   चैत, काठमाडौं । विवेकशील साझा पार्टीको असन्तुष्ट पक्षले पार्टी अध्यक्ष रवीन्द्र मिश्रलाई निस्कासन किन नगर्ने भनेर ३ दिने स्पष्टीकरण सोध्ने निर्णय गरेको छ ।

जेष्ठ सदस्य भीम अधिकारीको नेतृत्वमा सोमबार बसेको बैठकले पार्टीको हित विपरित गरेकाले स्पष्टीकरण सोध्ने निर्णय गरेको हो । आइतबार केन्द्रीय समिति बैठकमा मिश्रले प्रदेश संयोजकहरु तोक्नुका साथै २६ जना केन्द्रीय सदस्यलाई निष्कासन गर्ने निर्णय सुनाएका थिए ।

मिश्रले एकलौटी रुपमा पार्टी चलाएको भन्दै असन्तष्ट समूहले सोमबार बैठक बोलायो, जसमा भौतिक र भर्चुअल गरी बहुमत (९० भन्दा बढी) सहभागी भएको दाबी छ । केन्द्रीय सदस्य सस्मित पोखरेलका अनुसार बैठकले आइतबार केन्द्रीय स्मितिको बैठकमा अध्यक्ष मिश्रले एकलौटी रुपमा गरेको भनिएको निर्णय अस्वीकार गर्ने निर्णय गरेको छ ।

पार्टी विधानको धारा ७१ बमोजिम अध्यक्ष पदबाट निष्कासन किन नगर्ने भनेर राजनीतिक दल सम्बन्धी ऐन, २०७३ को दफा १८ बमोजिम स्पष्टीकरण सोधिने निर्णय गरिएको हो । असन्तुष्ट पक्षको बैठकको निर्णयमा भनिएको छ, ‘अध्यक्ष रवीन्द्र मिश्रलाई ३ दिन भित्रमा स्पष्टीकरण पेस गर्न निर्देशन गरिने निर्णय गरियो ।’

स्पष्टीकरण प्राप्त भएर वैधानिक कारबाही नहुँदासम्म मिश्रलाई पार्टीको बैठक आह्वान गर्न रोक लगाउने निर्णय पनि असन्तुष्ट समूहको बैठकले गरेको छ । चारबुँदे निर्णय लिएर असन्तुष्ट समूहका नेताहरु सोमबार नै निर्वाचन आयोग पुगेका थिए ।