चुनावी गठबन्धनबारे विश्वप्रकाश र गगनबीच कुरा मिलेन

१४ चैत, काठमाडौं ।  नोपली कांग्रेसको केन्द्रीय समिति बैठकमा चुनावी गठबन्धनमा जान हुने र नहुनेबीच बहस भइरहेका बेला महामन्त्री विश्वप्रकाश शर्मा र गगन थापाको मत पनि बाझिएको छ ।

बैठकमा महामन्त्री थापाले चुनावमा गठबन्धन गर्न नहुने अडान राख्दा विश्वप्रकाशले आवश्यकताका आधारमा गठबन्धन गर्नुपर्ने बताएका छन् । बैठकमा महामन्त्री थापाले गठबन्धन गरेर नभई कांग्रेस एक्लै चुनावमा जानु पर्ने मत राखे । थापाले लाखौँ मतदाता नयाँ थपिएकाले पहिलो पटक नै अन्य चिह्नमा भोट हाल्न लगाउँदा उनीहरूलाई कांग्रेस बनाइराख्न गाह्रो हुने उदाहरण पेस गरे ।

’अहिले लाखौँ मतदाता नयाँ छन् । तीनलाई पहिलोपल्ट अन्य चिह्नमा भोट हाल्न लगाउँदा भोलि कांग्रेस बनाउन सकिन्छ त ?,’ उनले भने । महामन्त्री थापाले कम्युनिस्टबाट लोकतन्त्रमा खतरा छ भन्ने र कम्युनिस्टलाई मिल्न नदिएर लोकतन्त्र बचायौं भनेर जाने हो भन्ने प्रश्न पनि गरेका थिए ।

बैठकमा आफ्ना धारणा राख्दै अर्का महामन्त्री शर्माले अघिल्लो निर्वाचनको तथ्यांक प्रस्तुत गर्दै गठबन्धन कायम राख्नु पर्ने बताए । उनले केही निर्वाचन क्षेत्रमा कांग्रेस एक्लै बलियो देखिए पनि केही ठाउँमा कमजोर रहेकाले गठबन्धन आवश्यकता अनुसार गर्नुपर्ने बताए ।

’हामी कतै एक्लै बलियो अवस्थामा छौँ । तर, केही ठाउँको स्थिति हेर्ने हो भने निकै कमजोर छौँ । त्यसैले गठबन्धन आवश्यकता अनुसार गर्नुपर्छ,’ उनले भने । कांग्रेस बैठकमा गठबन्धन गर्ने कि एक्लै चुनावमा जाने भन्ने विषयमा नेताहरूबीच जुहारीसमेत चलेको छ ।