१२ घण्टासम्म विजुली नआएपछि उद्योगीले मागे लोडसेडिङ तालिका

१५ चैत, विराटनगर । उद्योग व्यवसायीहरुले नेपाल विद्युत प्राधिकरणले दैनिक १२ घण्टासम्म विद्युत कटौती गरेको बताएका छन् । एक सातायता विद्युत प्राधिकरणले औद्योगिक क्षेत्रमा पर्याप्त विजुली दिन नसक्दा समस्या परेको पूर्वका उद्योगी–व्यवसायीको भनाई छ ।

गत मंगलबारयता अघोषित रुपमा भइरहेको लोडसेडिङले ६० प्रतिशत उत्पादन कटौती भएको र नियमित विद्युत दिन सक्दैन भने सरकारले लोडसेडिङको तालिकका दिनुपर्ने बताएका छन् ।
उद्योगी–व्यवसायीहरुका अनुसार गत मंगलबार ४ घण्टा विजुली कटौती भएको थियो । तर त्यसपछि विजुली कटौती बढ्दै गएको छ । आइतबार राति १२ घण्टासम्म विजुली कटौती भोगेका व्यवसायीले सोमबार भने अपरान्ह ४ बजेदेखि मंगलबार विहान ६ बजेसम्म विजुली नपाएको बताए ।

अनियमित रुपमा विद्युत कटौती हुँदा उद्योगका मजदुर कामविहीन हुनुपर्ने अवस्था आएको मोरङ व्यापार संघका अध्यक्ष नविन रिजालले बताए । विद्युत नियमित नभए उद्योगहरु बन्द हुने अवस्थामा पुग्ने उनले बताए ।