सहमति विपरित गए देउवाबिरुद्ध जान कोइराला समूहले निकाल्यो चार विकल्प

१५ चैत, काठमाडौं ।  स्थानीय तहको निर्वाचन नजिकिदै गएको समयमा नेपाली कांग्रेसभित्र आन्तरिक व्यवस्थाप नै झनझन पेचिलो बन्दै गएको छ । संस्थापन पक्षलाई राम्रै दवावमा राख्ने संस्थापनइतर (कोइराला) समूहको तयारी छ ।

केन्द्रीय समितिमा आफ्नो पक्षको स्पष्ट बहुमत रहेपछि संस्थापनइतर समूहलाई खासै वास्ता नगरिरहेका सभापति शेरबहादुर देउवा अझै पार्टीमा सहअस्तित्वलाई ग्रहण गर्ने पक्षमा देखिएका छैनन् । देउवाले चालेका सुरुकै कदमबाट असन्तुष्ट बनेको कोइराला समूहत भने उनलाई गलाउने रणनीतिमा जुटिरहेको छ ।

सभापति देउवाका कार्यशैली प्रति सशंकित कोइराला समूह सभापति शेरबहादुर देउवा ४० प्रतिशत मतलाई बेवास्ता गर्दै एकलौटी अघि बढ्न खोजेको निष्कर्ष निकाल्दै त्यसबिरुद्ध जाने तयारीमा जुटिसकेको छ ।

देउवाले नेविसंघ र तरण दलको नेतृत्व एकलौटी बनाएपछि सोमबार कोइराला पक्षका भातृ तथा शुभेच्छुक संस्थाका प्रतिनिधिले खबरदारी सभा समेत गरेर देखाइसकेका छन् । त्यसको समीक्षा गर्न मंगलबार कांग्रेस महामन्त्री गगन थापाको सचिवालय ज्ञानेश्वरमा बैठक बसेर चारवटा निष्कर्ष समेत सार्वजनिक गरेका छन् ।

१४औँ महाधिवेशनमा प्राप्त ४० प्रतिशतभन्दा बढी मतलाई सभापतिले बेवास्ता गरेर एकलौटी ढंगले अगाडि बढ्न खोजेकाले बाध्य भएर आन्दोलनमा जानुपर्ने अवस्था आउने बैठकको पहिलो निष्कर्ष छ ।

संसदीय समिति गठन गर्दा शेखर कोइराला समूहका वरिष्ठ नेताहरूलाई नसमेट्ने हो भने पार्टी नेतृत्वविरुद्ध देशैभर आन्दोलन गर्नुको विकल्प नरहने पनि उनीहरुले ठहर गरिसकेका छन् ।

यस्तै भातृसंस्थालगायत आउँदो तीनै तहका निर्वाचनमा शेखर कोइराला समूहलाई समान अवसर र न्यायोचित व्यवस्थापन नगर्ने हो भने चुनाव जित्ने होइन, पार्टीभित्रै विद्रोह हुने अवस्था आउने निष्कर्ष कोइराला समूहको छ ।

सभापति चरम गुटबन्दीमा लागेको र सभापति देउवाले पार्टीभित्रको अपोजिसनलाई कमजोर पार्न बूढा नेताहरूको गठजोड तयार पारिरहेको भन्दै यसकाबिरुद्धमा पनि कार्यक्रयम बनाउने तयारमा यो समूह रहेको छ ।