चुनावको नतिजा हाम्रो पक्षमा आउँछ, अरु पार्टीले जालझेल गरे ठिक पार्नुपर्छः प्रचण्ड

१५ चैच, काठमाडौं ।  नेकपा माओवादी केन्द्रका अध्यक्ष पुष्पकमल दाहाल प्रचण्डले यसपटकको निर्वाचन परिणाम माओवादीको पक्षमा आउने दाबी गरेका छन् । उनले माओवादीतर्फ आएको मत परिणामलाई अरु पार्टीले जालझेलपूर्ण तरिकाले आफ्नो पक्षमा पार्न खोजे त्यसको प्रतिकार गरिने बताएका छन् ।

पार्टी केन्द्रीय कार्यालय पेरिसडाँडामा सिन्धुपाल्चोकको हेलम्बु गाउँपालिकाका युवाहरूलाई पार्टी प्रवेश गराउँदै देशभर युवाहरूको पार्टीमा आकर्षण बढेकाले निर्वाचन परिणाम माओवादीको पक्षमा पार्न असहज नभएको दाबी गरे । उनले यसअघि अनेक जालझेल गरेर अन्य पार्टीले निर्वाचनको परिणाम हात पारेको भएपनि यसपटक निर्वाचनको नतिजा सुल्टिएर माओवादीको पक्षमा आउने बताए ।

उनले माओवादीमा प्रवेश गरेर सचेत युवा वर्गले सही निर्णय लिएको पनि बताए । तपाईं युवाहरूले सही निर्णय गर्नुभयो । तपाईंहरूलाई बधाई र स्वागत गर्न चाहन्छु । संघीय लोकतान्त्रिक गणतन्त्रको जन्मदाता माओवादी केन्द्र हो ।

संविधानको रक्षा गर्न, सामाजिक न्यायसहितको समाज बनाउन र देशको समृद्धिसँगै विकास गर्ने पार्टी माओवादी हो । अब यसपटक निर्वाचनको नतिजा हामीले सुल्टाउन सक्नुपर्छ, प्रचण्डले भने ।