बालकृष्ण खाँण र ज्ञानेन्द्रबहादुर कार्की नअटेपछि गठन भएन संसदीय समिति

१५ चैत, काठमाडौं । संस्थापन पक्षका प्रभावशाली नेता नअटाउने अवस्था आएपछि कांग्रेस केन्द्रीय समिति, संसदीय समिति गठन गर्न असफल भएको छ । पार्टी सभापति शेरबहादुर देउवानिकट मानिएका दुई जना नराखी समिति गठन गर्न देउवाले आनाकानी गरेपछि संसदीय समिति गठन नभएको बताइएको छ ।

आफु अनुकुल समिति बन्ने नदेखेपछि देउवाले मंगलबार जारी केन्द्रीय समितिको बैठकमा यो प्रस्ताव नै नलगेको एक नेताले जानकारी दिए । पदाधिकारीको अनौपचारिक छलफलमा तय गरिएका नाममा डा. रामशरण महत, अर्जुननरसिंह केसी, चित्रलेखा यादवलगायतका नेताहरु हटाउनुपर्ने देखिएको थियो ।

उनीहरुले समितिबाट आफु नहट्ने बताएका थिए । उनीहरुले नमानेपछि एनपी सावद, बालकृष्ण खाँण, ज्ञानेन्द्रबहादुर कार्कीलाई संसदीय समितिमा राख्ने ठाँउ नपुगेको हो । उनीहरु नअट्ने स्थिति देखिएपछि फेरि पनि छलफल गरी सहमति निकाल्ने भन्दै आजलाई समिति गठनको विषय स्थगित गरिएको हाे ।

संसदीय समितिमा संथापनइतर समूहले पनि दवाव दिदै आएको छ । कोइराला समूहले आफुहरुले महाधिवेशनमा पाएको ४० प्रतिशतको हिस्सा समितिमा पाउनुपर्ने अडान राख्दै आएको छ ।