आजदेखि नमुना मतपत्र छापिने,आयोग र केन्द्रबीच छपाइको सम्झौता भने हुन बाँकी

१६ चैत, काठमाडौं ।  निर्वाचन आयोगले आजदेखि नमुना मतपत्र छाप्न सुरु गर्ने भएको छ । जनक शिक्षा सामाग्री केन्द्रबाट आगामी स्थानीय तह निर्वाचनको मतपत्र छाप्ने सहमतिअनुसार बुधबारदेखि नमुना मतपत्र छाप्न सुरुगर्ने भएको हो । मतपत्र छपाइका लागि सबै तयारी सकिएको र नौ वटा मेसिनबाट मतपत्र छापिने बताइएको छ ।

निर्वाचन आयोगले आजदेखि नमुना मतपत्र छाप्न सुरु गर्ने जानकारी दिएको हो । नमुना मतपत्रको १२ बजेसम्म डिजाइन टुंगो लगाएर आजदेखि मेसिनको परीक्षण गरिने भएको छ । आयोगकाअनुसार १७ गतेबाट देशभरका सबै मतदाताका लागि मतपत्र छाप्न सुरु गरिनेछ ।

आयोगले करिब २ करोड मतपत्र छाप्ने गरी तयारी गरिहेको छ । जिल्लाको मतदाता अनुसार मतपत्र छापिने बताइएको छ । जनक शिक्षा केन्द्रसँग रहेको मेसिनले प्रतिघण्टा मेसिनले १५ हजार मतपत्र छाप्ने छ । यसअनुसार एक घण्टामा नौ वटा मेसिनले १ लाख ३५ हजार मतपत्र छपाइ हुन्छ ।

आयोगले मतपत्र छाप्न मौखिक जानकारी गराए पनि हालसम्म लिखित रुपमा सम्झौता भने नभएको केन्द्रले जनाएको छ । सम्झौता भएलगत्तै मतपत्र छाप्न सुरु गर्ने तयारी जनक शिक्षाको छ ।