गठबन्धनमा भरतपुर महानगरको मेयरमा हाम्रो दावी कायम रहन्छः प्रचण्ड

१६ चैत, काठमाडौं ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले चितवनको भरतपुर महानगारमा माओवादीको दावी कायमै रहने बताएका छन् ।

भरतपुर विमानस्थलमा बुधबार सञ्चारकर्मीहरुसँग कुरा गर्दै अध्यक्ष प्रचण्डल महानगरको विकासमा माओवादीको भूमिका उल्लेख्य रहेको र फेरी पनि दावी रहने बताए ।

प्रचण्डले माओवादीको दावी कायमै रहेपनि गठबन्धनमा यो विषयमा छलफल नभएको र भोलि बिहीबार बस्ने गठबन्धनको बैठकमा महानगरपालिकाहरुमा तालमेलको निर्णय हुने जानकारी दिए । महानगरपालिका र उपमहानगरपालिकामा गठबन्धन गर्ने निर्णय केन्द्रबाटै हुने भएकाले पहिले गठबन्धनभित्र सहमति हुनुपर्ने बताए ।

उनले भरतपुरको मेयरमा आफ्नो पार्टीको दाबी रहने दोहोर्याउँदै यसअघिको स्थानीय तह निर्वाचनमा पनि कांग्रेस र माओवादीबीच गठबन्धन भएको उल्लेख गरे ।

अध्यक्ष प्रचण्डले नेपाली कांग्रेसको केन्द्रीय कार्यसमितिको बैठकले निर्णय गरिसकेपछि गठबन्धनका बीचमा आवश्यकताअनुसार तालमेल हुने पक्का भएको बताए ।