नेपालमा एमालेसँग एक्लै चुनाव लड्ने आँट भएका राजनीतिक दल छैनन्ः अध्यक्ष ओली

१६ चैत, काठमाडौं ।  नेकपा एमाले अध्यक्ष केपी शर्मा ओलीले गठबन्धनविना एमालेसँग चुनाव लड्न सक्ने हिम्मत नेपालका कुनै पनि राजनीतिक दलसँग नभएको बताएका छन् । भक्तपुरमा अर्गानिक तरकारी बजारको बुधबार उद्घाटन गर्दै एमालेसँग चुनाव लड्न हिम्मत चाहिने बताए ।
ओलीले अहिलेको पाँच दलिय गठबन्धनमा रहेका दलहरूलाई एक्ला एक्लै चुनावमा लड्ने हिम्मत नभएकै कारण गठबन्धन बनाएको बताए । उनले कांग्रेस एक्लै आउला कि भन्ने आस थियो त्यो पनि डराएर गठबन्धनमा गएको दावी गरे ।

ओलीले भने, ’एक्लै एमालेसँग लड्छु भन्ने सोच्नै सकिँदैन । हामीलाई पनि अलिकति हैसियत मिल्नेसँग चुनाव लड्न सजिलो हुन्छ । उनीहरू एक्लै भयो भने त हामीले कसरी चुनाव लड्ने ? त्यसैले अब बल्ल हैसियत मिलेको छ ।’

एमालेमा देशभर पार्टी प्रवेशको जनलहर आइरहेको देखेर अन्य दल त्रसित भइरहेको बताए । ’अन्य दलका नेता कार्यकर्ता रित्तिन लागेका छन् । हाम्रो पार्टी भरिन लागेको छ । यो जनलहर आगामी चुनावमा एमालेलाई विजयी गराउनको लागि हो,’ अध्यक्ष ओलीले भने ।