किसानका बारीदेखि व्यापारीका गोदामसम्म उज्यालो छर्ने बजेट आउँछः अर्थमन्त्री शर्मा

१६ चैत, काठमाडौं ।  अर्थमन्त्री जनार्दन शर्माले आगामी आर्थिक वर्ष २०७९÷८० को बजेटले आर्थिक क्षेत्रका सबै पक्षलाई समट्ने बताएका छन् । उनले अर्थ व्यवस्थाका सबै क्षेत्रले महशुस गर्ने गरी नयाँ वर्षको बजेट तयारी भइरहेको बताए ।

नेपाल आर्थिक संघ, बैंक तथा वित्तीय संस्था परिसंघ नेपाल र अर्थ मन्त्रालयले संयुक्त रुपमा आयोजना गरेको वृहत आर्थिक बहस कार्यक्रममा बोल्दै उनले किसानले आफ्नै बारीमा बजेट पसेको महसुस गर्ने दावी गरे । शर्माले आफ्नो चाहना सबै क्षेत्रका व्यावसायीले आफ्नो गोदाममा उज्यालो पसेको महशुस गरुन भन्ने रहेको भन्दै बजेट सबैको अपनत्व हुने गरी निर्माण भइरहेको बताए ।

अहिले अर्थतन्त्रका बारेमा धेरै कोणबाट चिन्ता भइरहेको भन्दै उनले बजेटले अर्थ व्यवस्थालाई नयाँ रुप दिने दाबी गरे । कृषि उत्पादन वृद्धि, आयात प्रतिस्थापन, रोजगारी सृजना, श्रम–सीपको उचित व्यवस्थापन, विकास खर्चमा सुधार, सुधारिएको लगानीको वातावरण, निजी क्षेत्रमैत्रीलगायतका विषयलाई प्राथमिकता दिएर बजेट निर्माण हुने उनको भनाइ छ ।

चालु आवको ८ महिनामा कुल वैदेशिक ब्यापारमा निर्यातको हिस्सा १० प्रतिशत नाघेको भन्दै उनले आगामी दिनमा यो तथ्यांकलाई थप सुधार गर्न उत्पादन वृद्धिको विकल्प नरहेको बताए । उनले बाह्य कारण अर्थतन्त्रमा असर परेको तर अर्थविदहरुले व्यक्तिगत रुपमा आफ्नो बारेमा नकारात्मक टिप्पणी गरेको समेत आरोप लगाए ।

चालु आवको ८ महिनाससम्ममा निर्यातले नयाँ कीर्तिमान राख्दै एक खर्ब ४७ अर्ब ७४ करोड रुपैयाँको निर्यात भएको थियो । जुन अघिल्लो बर्षको भन्दा ८२.९० प्रतिशत बढी हो । उनले व्यापार घाटा कम गर्न थप के कस्ता काम गर्न सकिन्छ भनेर सुझाव समेत मागेका छन् ।