कांग्रेसले किन गर्यो यति चाँडै क्रियाशील सदस्यता खुला गर्ने निर्णय ?

१६ चैत, काठमाडौं ।  नेपाली कांग्रेसको मंगलबार सम्पन्न केन्द्रीय कार्यसमितिको बैठकले क्रियाशील सदस्यता वितरण खुला गरेको छ । विगतका वर्षहरुमा क्रियाशील सदस्यता वितरण विवादित बन्दै आएको थियो भने यसपटक महाधिवेशन सकिएको चार महिना नबित्दै कांग्रेसले क्रियाशील सदस्यता वितरण खुला गरेको हो ।

पार्टी प्रवक्ता डा. प्रकाशशरण महतका अनुसार केन्द्रीय कार्यसमिति बैठकले आसन्न निर्वाचन समेतलाई लक्षित गर्दै सदस्यता वितरण प्रारम्भ गर्ने निर्णय गरेको हो । महतले विधानको धारा ४ बमोजिम देशव्यापीरुपमा पार्टीको सदस्यता र क्रियाशील सदस्यता वितरण प्रारम्भ गर्ने निर्णय भएको बताएका छन् ।

महाधिवेशनको मुखमा मात्रै सदस्यता वितरण र नवीकरण गर्ने पूरानो अभ्यासलाई तोड्ने प्रयासस्वरुप विधानको व्यवस्थाबमोजिम सदस्यता खुला गर्ने निर्णय भएको महतको भनाई छ । अहिले विधानले समेत सदस्यतासम्बन्धी प्रष्ट व्यवस्था गरेकाले समयमै खला गरिएको उनले बताए ।

कांग्रेस विधानको धारा ४ ले कांग्रेसका दुई खाले सदस्य हुने व्यवस्था अनुसार साधारण सदस्य र क्रियाशील सदस्यको व्यवस्था गरिएको छ । १८ वर्ष उमेर भएका, कांग्रेसको आदर्श, उद्देश्य र विधानमा आस्था भएको व्यक्तिलाई साधारण सदस्यता दिने व्यवस्था छ ।

साधारण सदस्यता प्राप्त गरेको एक वर्ष पूरा भएपछि त्यस्तो व्यक्तिलाई तोकिएको फारम भराई शुल्क लिएर क्रियाशील सदस्यता दिने व्यवस्था विधानमा छ ।

यसअघि क्रियाशील सदस्यता छानबिन समितिले क्रियाशील सदस्यतालाई व्यवस्थित गर्न पार्टीले छुट्टै विभाग बनाउनुपर्ने र महाधिवेशनको समयबाहेक सधैँ सदस्यता खुला राख्नुपर्ने सिफारिस गरेको थियो । कांग्रेसले ४ लाख ७० हजार क्रियाशील सदस्यबाट बढाएर ८ लाख ४० हजार १०६ जना क्रियाशील सदस्य पुर्याइएको छ ।

प्रदेशअनुसार प्रदेश एकमा १,७४,८१३, मधेश प्रदेशमा १,००,९९९,बाग्मती प्रदेशमा १,८६,३३५, गण्डकी प्रदेशमा १,१८,१४५, लुम्बिनी प्रदेशमा १,३१,११७, कर्णाली प्रदेशमा ५३,५९६ र सुदुरपश्चिम प्रदेशमा ७५,१०१ क्रियाशील सदस्य रहेका छन् ।