सरकारका विषयमा देउवा र ठाकुरबीच छलफल हुँदै

१६ चैत, काठमाडौं । सरकारमा सहभागि हुने लगायतका विषयमा प्रधानमन्त्री शेरबहादुर देउवा र लोकतान्त्रिक समाजवादी पार्टी नेपालका अध्यक्ष महन्थ ठाकुरबीच छलफल हुने भएको छ । बुधबार साँझ सरकारमा लोसपाको सहभागिताको विषयमा ठाकुरले देउवासँग छलफल गर्न लागेका हुन् ।

स्थानीय तहको चुनाव अघि नै लोसपालाई सरकारमा ल्याउने प्रधानमन्त्री देउवाको तयारी रहेपनि लोसपाले चारवटा मन्त्रालय माग गरेको छ । प्रधानमन्त्री देउवाले दुईटा मन्त्रालय दिने बताएका छन् ।

अहिले प्रधानमन्त्री देउवासँग दुईटा मन्त्रालय खाली पनि छन् । देउवाले आजको छलफलपछि लोसपालाई सरकारमा ल्याउने विषयमा गठबन्धनका नेताहरुसँग छलफल गर्ने बताइएको छ ।

गठबन्धनमा सहमति भए प्रधानमन्त्री देउवाले भारत भ्रमणमा जानुअघि पनि लोसपाका मन्त्रीहरुलाई शपथ खुवाउन तयारी गरको बताइन्छ । यस विषयमा आजको भेटघाटमा केही टुंगो लाग्ने जसपाका एक कार्यकारिणी सदस्यले बताए ।