प्रधानमन्त्री भारतबाट फर्किपछि बस्ने गरी ठोस निर्णय बिना सकियो गठबन्धनको बैठक

१७ चैत, काठमाडौं ।  स्थानीय तहको निर्वाचनमा गरिने तालमेलबारे छलफल गर्न बसेको सत्ता गठबन्धन दलका शीर्ष नेताहरूको बैठक कुनै ठोस निर्णय नगरी सकिएको छ । प्रधानमन्त्री शेरबहादुर देउवा भारत भ्रमणको तयारीमा व्यस्त रहेकाले पनि आजको बैठकमा भएको छलफलबाट कुनै खास निष्कर्ष नआएको हो ।

प्रधानमन्त्रीको सरकारी निवास बालुवजाटारमा बसेको बैठकमा प्रधानमन्त्रीको आसन्न भारत भ्रमण, उक्त भ्रमणमा नेपालका तर्फबाट उठाउने एजेन्डाबारे नेताहरुबीच छलफल भएको थियो । बैठकमा नेकपा माओवादीका अध्यक्ष पुष्पकमल दाहाल र एकिकृत समाजवादीका नेताले प्रधानमन्त्री देउवालाई भारतसँग प्रष्टसँग आफ्ना विषय राख्न भनेका थिए ।

स्थानीय तहको निर्वाचनमा तालमेल गर्दा दलहरुले निभाउनुपर्ने भूमिका र त्यसको मोडालिटी तयार गर्ने विषयमा पनि सामान्य छलफल भएको छ । प्रधानमन्त्री देउवा भारत भ्रमणमा रहेका बेला गठबन्धनका अन्य नेताहरुले तालमेलबारेको मोडालिटी तयार पार्ने र प्रधानमन्त्री आएपछि निर्णयक छलफल गर्ने भएका छन् ।

गठबन्धन दलका दोस्रो तहका नेताहरुले तालमेलको मोडालिटी, तालमेल हुनसक्ने स्थानीय तह, सहमति भएका तहमा उठाउने उम्मेदवार लगायतका विषयमा छलफल गरी खाका तयार पार्ने बताइएको छ । प्रधानमन्त्री शेरबहादुर देउवाको भोलिदेखि हुने तीनदिने भारत भ्रमणमा नेपालका तर्फबाट उठाइने एजेन्डामा थप काम बाँकी रहेकाले देउवाले हतार गरेपछि बैठकबाट नेताहरु उठेको बताइएको छ ।