प्रधानमन्त्रीलाई गठबन्धन दलको शुभकामना, देउवासँगै चारमन्त्री भारत जाने

१७ चैत, काठमाडौं ।  छिमेकी देश भारत भ्रमणको तयारीमा रहेका प्रधानमन्त्री शेरबहादुर देउवालाई सत्ता गठबन्धनमा आबद्ध दलका शीर्ष नेताहरूले भारत भ्रमण सफलताका लागि शुभकामना दिएका छन् ।

भारत भ्रमणको पूर्वसन्ध्यामा आज बालुवाटारमा बसेको गठबन्धनका नेताहरूको बैठकमा उनीहरूले प्रधानमन्त्रीलाई शुभकामना दिएका हुन् । सञ्चार तथा सूचना प्रविधिमन्त्रीसमेत रहेका सरकारका प्रवक्ता ज्ञानेन्द्रबहादुर कार्कीले बैठकपछि प्रधानमन्त्रीको भोलिबाट सुरु हुने भारत भ्रमणका लागि सबै गठबन्धनका शीर्ष नेताहरूले शुभकामना दिएको बताए ।

भारतीय पक्षले कतिपय विषयमा चासो नराखेको भन्ने प्रश्नमा मन्त्री कार्कीले नेपाल–भारत सम्बन्ध बहुआयामिक रहेको जवाफ दिए । नेपाल–भारतबीच सरकार–सरकार मात्र होइन, जनता–जनताको पनि सम्बन्ध रहेको उनले बताए । उनले भारत भ्रमणका क्रममा प्रधानमन्त्रीले उठाउन लागेका एजेन्डा सहि भएको बताए ।
यस्तै प्रधानमन्त्रीसँग चारमन्त्री पनि भारत जाने भएका छन् । आज बिहान बालुवाटारमा बसेको मन्त्रिपरिषद्को बैठकले चार मन्त्री पनि भारत भ्रमणमा जाने निर्णय गरेको हो ।

प्रधानमन्त्रीसँगै परराष्ट्रमन्त्री डा. नारायण खड्का, ऊर्जा, जलस्रोत तथा सिँचाइमन्त्री पम्फा भुसाल, कृषि तथा पशुपन्छी विकासमन्त्री महिन्द्र राय यादव र स्वास्थ्य तथा जनसंख्यामन्त्री विरोध खतिवडा भारत भ्रमणमा जाने निर्णय भएको कार्कीले बताए ।