पैसा देखाएर हैन, विचार,सिद्धान्त र लक्ष्यमा भोट मागे चुनाव खर्च अपुग हुँदैनः प्रमुख आयुक्त

१७ चैत, काठमाडौं ।  निर्वाचन आयोगका प्रमुख निर्वाचन आयुक्त दिनेश थपलियाले निर्वाचनमा पैसालाई भन्दा आफ्नो विचार र सिद्धान्तलाई प्राथमिकतामा राखेर उम्मेदवारले भोट माग्गनुपर्ने बताए का छन् ।

उनले आयोगले दिएको खर्चको सीमा कम भएको भन्ने गुनासो सही नभएको भन्दै अहिले को भन्दा बढी खर्चको सीमा राख्नैपर्ने कुनै कारण नभएको बताएका छन् ।

बिहीबार काठमाडौंमा आयोजित एक कार्यक्रममा थपलियाले चुनावमा आफू उम्मेदवार भएकोबारे मतदातालाई जानकारी दिन खर्च अपुग नहुने तर, अप्ठ्यारै अवस्था आए त्यसमा पुनरावलोकन गर्न आयोग तयार रहेको बताए । उनले आचारसंहितमा तोकिएको खर्चले उम्मेदवार निर्वाचित हुन नसक्ने भन्ने प्रश्नै नआउने बताए ।

उनले आचारसंहितामा उम्मेदवारले गर्न पाउने भनेर तोकिएका कामको लागि तोकिएकै खर्च पुग्ने बताए । एउटा वडा अध्यक्षले ३ लाख रुपैयाँ खर्च गरेर आफ्नो वडाभित्र गएर म उम्मदवार हुँ भन्नु भन्दा सिद्धान्त र विचार देखाएर मलाइ भोट दिनुस् भन्दा उपयुक्त हुने उनको भनाइ छ ।

प्रमुख आयुक्त थपलियाले निर्वाचनमा उम्मेदवारलाई तोकिएको भन्दा बढी पैसा किन र के का लागि चाहिएको हो त्यो स्पष्ट भन्नुपर्ने भन्दै चुनाव भड्किलो र महंगो हुँदा लोकतन्त्र खतरामा पर्ने बताए ।

उनले सिद्धान्त, विचार र इमानले जितोस्, मनी र मसल पराजित होस् भन्ने असल मनसायका साथ गरेको कुरा पनि करोड करोडका गफ दिएर निस्तेज पार्ने हो भने लोकतन्त्रप्रतिको ओठेभक्ति मात्र हुने बताए ।