प्रधानमन्त्रीको भ्रमणप्रति विपक्षी एमाले असन्तुष्ट, देउवाले कूटनीतिक पराम्परा तोडेको आरोप

१८ चैत, काठमाडौं ।  प्रमुख प्रतिपक्षी दल नेकपा एमालेले प्रधानमन्त्री शेरबहादुर देउवाको आजबाट हुने भारत भ्रमणका क्रममा नेपालले उठाउने विषयमा जानकारी नगराएको भन्दै असन्तुष्टि जनाएको छ ।

एमालेले प्रधानमन्त्रीले कुनैपनि देशको भ्रमण गर्दा विपक्षी दलहरुलाई त्यहाँ राखिने विषयहरुबारे जानकारी गराउने कूटनीतिक परम्परा समेत मिचेको आरोप लगाएको छ । एमालेले देश, जनता र विपक्षीले समेत जानकारी नपाएका विषयहरु बोकेर गरिने भ्रमण अपारदर्शी भएको बताएको छ ।

नेकपा एमाले विदेश विभाग प्रमुख राजन भट्टराईले प्रधामन्त्री शेरबहादुर देउवा शुक्रबार भारत भ्रमणम जाने कुरा सञ्चारमाध्याबाट मात्र थाहा भएको भन्दै भारत भ्रमण र यसका एजेण्डाबारे सरकार र प्रधामन्त्रीको सचिवालयबाट समेत औपचारिक सूचना समेत नआएको बताए ।

भट्टराईले देशको प्रधानमन्त्रीले कुनै पनि देशको भ्रमणमा जाँदा संसद भए संसद र नभए अन्य विपक्षी पार्टी र सम्बन्धी निकायहरुलाई जानकारी गराउने परम्परा देउवाले तोडेको बताउँदै देशले थाहा नपाएको मुद्धा बोकेर गएका प्रधानमन्त्रीको भ्रमणबाट कुनै उपलब्धी प्राप्त नहुने दावी गरेका छन् ।

एमालेले नेपाल सरकार र भारत सरकारबीच यसअघि देखिएका असमझदारी, केपी ओली नेतृत्वको सरकारले जारी गरेको नयाँ नक्शा, सीमा समस्या,सन्धी सम्झौता लगायतका विषयमा दलीय सहमति जुटाएर जानुपर्नेमा के विषय र किन प्रधानमन्त्री भारत जान लागेको भन्ने समेत थाहा नहुन दुःखद भएको जनाएको छ ।

प्रधानमन्त्रीले नेपाल र भारतीय सीमा क्षेत्रमा देखिएका समस्या, बढ्दो व्यापार घाटा र आयातमा देखिएको समस्या, इन्धनमा समस्यादेखि ईपीजीको प्रतिवेदन भारतले स्वीकार नगरिहेको कुराले दुई देशबीचमा बढेको अविश्वास हटाउन नसक्ने एमालेको ठहर छ ।