व्यवसायीद्वारा इन्धन ढुवानी बन्द, बाँकी इन्धनले उपत्यकालाई डेढ दिन पनि नधान्ने

१८ चैत, काठमाडौं । विभिन्न प्रकारका इन्धन ढुवानी गर्दै आएका व्यवसायीहरुले शुक्रबार (आज) देखि ढुवानी बन्द गरेका छन् । नेपाल आयल निगमसँग विभिन्न माग राख्दै आन्दोलित व्यवसायीहरुले पेट्रोलियम पदार्थको ढुवानी देशभर बन्द गरेका हुन् ।
आयल निगमले इन्धन खरिद गर्ने भारतीय डिपो र नेपालस्थित निगमको डिपोबाट डिलरले खरिद गर्ने सबै प्रकारका पेट्रोलियम पदार्थको ढुवानी व्यवसायीहरुले ढुवानी गर्दै आएका थिए । आजदेखि नेपाल आयल र व्यवसायीबीच सहमति नभएसम्म नेपाली सेना, साझा र साल्ट ट्रेडिङबाट हुने ढुवानी मात्रै नियमित हुनेछ ।

नेपाल आयल निगम कर्मचारीकाअनुसार सरकारी तहबाट भइरहेको ढुवानी बन्द नहँदा पनि बजारमा सवै खाले इन्धको सम्स्या उत्पन्न हुनेछ । काठमाडौंमा इन्धन आपूर्ति गर्ने निगमको थानकोट डिपोबाट गएरातीसम्म १३ लाख लिटर डिजेल र ११ लाख लिटर पेट्रोल पम्पहरुले उठाएका छन् । यो इन्धनले काठमाडौं उपत्यकामा करिब डेढ दिनको माग पनि नधान्ने अवस्था छ ।

व्यवसायीले बन्द गरेपछि ढुवानीमा संलग्न १४ सय ट्यांकर र करिब १ हजार बुलेटबाट पेट्रोल, डिजेल, मट्टितेल, हवाई इन्धन र खाना पकाउने ग्याँसको दैनिक आपुर्ति प्रभावित हुने भएको छ । व्यावसायीको अवरोध कायमै रहे देशभर पेट्रोलियम पदार्थको अभाव हुनसक्नेछ ।

घोडेजात्र बिदा परेकाले आज आयल निगमले औपचारिक रुपमा वार्ता गर्न नसक्ने जनाएको छ । व्यवसायीहरुले पनि निगम माग पुरा गराउने सहमतिमा नआएसम्म ढुवानी बन्दको कार्यक्रम जारिरहने बताएका छन् ।