कांग्रेसभित्र बसेर कांग्रेसकै खेदो खन्नेलाई पार्टी छोडेर जान नेता सिंहको चेतावनी

१८ चैत, काठमाडौं । नेपाली कांग्रेसका नेता प्रकाशमा सिंहले कांग्रेस हुँ भन्दै बसिरहने तर बाहिर आएपछि कांग्रेसको खेदो खनेर विरोध गर्ने नेता तथा कार्यकर्तालाई पार्टी छोडेर जान चेतावनी दिएका छन् । उनले पार्टीमा बसेर विरोध मात्रै गरिरहनेलाई पार्टीले तत्काल कारवाही गर्नुपर्ने पनि बताए का छन् ।

काठमाडौ क्षेत्र नं. १ ले नयाँ बानेश्वरमा शुक्रबार आयोजना गरेको कार्यक्रममा सिंहले कांग्रेस पार्टीको निर्णयअनुसार स्थानीय आवश्यकताका आधारमा गठबन्धन गरेर निर्वाचनमा जाने भन्दै पार्टीले गरेको निर्णय नमान्नेहरूले पार्टी छाडेर जानुपर्ने दावी गरे ।

उनले कांग्रेसभित्र बसेर कांग्रेसलाई कमजोर बनाउनेहरू पार्टीमा बस्नु उपयुक्त नहुने बताउँदै आफूलाई क्रान्तिकारी भन्ने पार्टीका केही नेताहरूले जानाजान गठबन्धनविरुद्ध बोलेर अनावश्यक भ्रम छरेको आरोप लगाए ।

पार्टीभित्र एकथरी समूह नियोजित रूपमा आफ्नो स्वार्थ पूरा नभएपछि व्यक्तिगत रूपमा चरित्र हत्याको अभियानमा लागेकोसमेत उनको भनाई छ । नेता सिंहले गठबन्धन जनताको म्यान्डेट नभए पनि परिस्थितिले मुलुकको आवश्यकता बन्न पुगेको बताए । उनले संविधान जोगाउन गठबन्धन आवश्यक भएकाले चुनावसम्मै गठबन्धन कायम रहने बताए ।