बेकाम हुँदै कांग्रेसको परिपत्र, डेटलाइनभित्र उम्मेदवार सिफारिस असम्भव बन्दै

१८ चैत, काठमाडौं । नेपाली कांग्रेसले स्थानीय तहको निर्वाचनका क्रममा वडा अध्यक्षको सम्भावित उम्मेदवार सिफरिस गर्न डेटलाइन तोकेर दिएको समय सकिन लाग्दा समेत तल्लो तहले अहिलेसम्म सिफरिस पठाउन सकेको छैन । कांग्रेसले परिपत्र जारी गर्दै चैत २१ भित्र आकांक्षीको नाम छानेर उपल्लाे तहमा सिफारिस पठाउन निर्देशन दिएको थियो ।

कांग्रेसले तलको तहलाई दिएको डेटलाइन सकिन अब तीन दिन मात्र बाँकी छ । तर, अहिलेसम्म कुनै पनि तहले उम्मेदवार सिफारिस गर्न सकेका छैनन् । कांग्रेस केन्द्रीय कार्यालयमा बसेको स्थानीय तह निर्वाचन केन्द्रीय परिचालन समितिले बिहीबार ७७ जिल्ला कार्यसमितिलाई परिपत्र गर्दै उम्मेदवार सिफारिसको तालिका पठाएको छ ।

परिपत्र अनुसार जिल्ला कार्यसमितिले वडा कार्यसमितिलाई वडाध्यक्षका उम्मेदवारको सिफारिस गर्न भनिएको छ । वडाध्यक्ष तथा वडा सदस्य पदमा उम्मेदवार हुन चाहनेबाट निवेदन आह्वान गर्ने र चैत २० मा बैठक गरेर वडाध्यक्षका लागि तीन जनाको नाम सिफारिस गर्न भनिएको थियो ।

परिपत्रमा वडाध्यक्ष सिफारिस गर्दा एक महिलासहित तीनजनाको नाम सिफारिस गर्नुपर्ने भनिएको छ । यस्तै वडा सदस्यका लागि खुला दुई सिटमा दुई महिलासहित ६ जनाको नाम सिफारिस गर्नुपर्नेछ । दलित महिला कोटामा बढीमा तीन जना दलित महिला मात्र सिफारिस गर्न कांग्रेसले भनेको छ ।

वडा कार्यसमितिले वडाध्यक्षका लागि सर्वसम्मत उम्मेदवार चयन गर्ने हो भने पनि चैत २० गते गरिक्नु पर्नेछ । जसमा दुइ दिन पनि बाँकी छैन् । वडाले चैत २१ गते वडाध्यक्ष र वडा सदस्यहरूको नाम सिफारिस गरी पालिका कार्यसमितिमा पठाउनुपर्ने हो । त्यसको पनि सुरसार नभएको पाइएको छ ।

पालिकाले भने २३ मा उम्मेदवार सिफारिस गर्नुपर्ने तालिका कांग्रेसको छ । पालिकाले उम्मेदवार सिफारिस गरेर प्रदेश सभा क्षेत्र पठाउनुपर्ने छ । प्रदेश सभा कार्यसमितिले चैत २५ मा उम्मेदवार सिफारिसको सूची प्रतिनिधिसभा क्षेत्रमा पठाउने र प्रतिनिधिसभा क्षेत्रले चैत २७ भित्र उम्मेदवार जिल्लामा पठाउनुपर्ने छ ।

जिल्लाले चैत २९ मा तल्ला तहबाट आएका उम्मेदवार सूची प्रदेशमा पठाउनुपर्ने र सम्बन्धित प्रदेशले वैशाख १ मा केन्द्रीय कार्यालयमा उम्मेदवार सूची पठाउनुपर्ने कांग्रेसको परिपत्रमा छ । उम्मेदवारको नाम माथिल्लो तहमा सिफारिस गर्नुभन्दा पहिले प्रत्येक कार्यसमिति बैठक गरी निर्णय गर्नुपर्ने पनि कांग्रेसले भनेको छ ।

निर्वाचन परिचालन समितिले उम्मेदवार सिफारिसका लागि परिपत्र गर्दै विधान अनुसारका संसदीय समिति, कार्यसम्पादन र अनुशासन समिति तत्काल गठन गर्न पनि निर्देशन दिएको छ । कांग्रेसमा उम्मेदवारलाई टिकट दिन प्रतिनिधि सभा क्षेत्र, जिल्ला, प्रदेश र केन्द्रमा संसदीय समिति रहने व्यवस्था छ ।