गठबन्धन बनाउने र भत्काउने राजनीतिः चुनावी तालमेल दलहरुको बाध्यता नै हो र ?
भेषराज पोखरेल
बैशाख २, २०७९ शुक्रबार १६:५०:२३
स्थानीय निर्वाचनको समय नजिकिँदै गर्दा राजनीतिक क्षेत्र द्रुतगतिमा चलायमान बनिरहेको छ । ठूला राजनीतिक दलका नेताहरुले आसन्न निर्वाचनमा जनमत आफ्नो पक्षमा आउने भाषण ठोकिरहेका छन् । साना कम्युनिष्ट दलहरुले भने निर्वाचनमा भाग लिने निर्णय गरिसकेका छैनन् । सत्ता वरिपरिका दलबाहेकका साना कम्युनिष्ट पार्टीहरुले आपसमा एकता गरेर निर्वाचनमा जान सके वैकल्पिक शक्तिका रुपमा उदाउने सम्भावना प्रशस्त थियो तर त्यो सम्भव हुने छाँट छैन ।
एमालेका अध्यक्ष केपी ओलीको संविधान मिच्ने कदमबिरुद्ध एकजुट भएका सरकार साझेदार दलहरु निर्वाचनमा गठबन्धन गरेर नगए एमालेलाई परास्त गर्न सकिँदैन भन्ने मानसिकतामा छन् । उनीहरु जसरी पनि निर्वाचनमा गठबन्धन गरेर नगए आफूहरुको शक्ति कमजोर हुने आंकलन गरिरहेका छन् र त्यसै अनुसार छलफललाई अगाडि बढाइरहेका छन् ।
एमाले भने सकेसम्म सत्ता साझेदार दलहरुबीचको गठबन्धन टुटाउने कसरतमा छ । त्यसो गर्न सकिएन भने कसरी आफ्नो पक्षमा जनमत ल्याउने भन्ने कसरतमा छ । प्रधानमन्त्री तथा कांग्रेस सभापति शेरबहादुर देउवा जसरी पनि गठबन्धन गरेरै जाने पक्षमा छन् भने कांग्रेसभित्रको डा.शेखर कोइराला पक्ष गठबन्धन गरेर जान नहुने पक्षमा छ । यी सबै अवस्थाले चुनावी तालमेलमा कस्तो प्रभाव पार्लान् ? चासोको विषय बन्न गएको छ ।
केपी ओलीसहित एमालेका नेताहरुले सबै दल एक भएर निर्वाचनमा गएपनि परास्त गरिछाड्ने भन्दै लल्कारिरहेका छन् । एमालेले माओवादी केन्द्र र एकीकृत समाजवादी तथा ती पार्टीका अध्यक्ष पुष्पकमल दाहाल ‘प्रचण्ड’, माधवकुमार नेपाललाई सकेसम्म अपमानित गर्ने तर ती दुवै पार्टीका अन्य नेताहरुलाई भने आफूतिर तान्ने रणनीति बनाएको देखिन्छ । अहिले गाउँ, शहर सबै क्षेत्रबाट नेता, कार्यकर्ता भित्राउने अभियान नै चलाएर आफ्नो गुमेको शक्ति पुनः आर्जन गर्ने दाउमा देखिन्छ । एमालेले अरु दलका असन्तुष्ट नेताहरुलाई भित्राएर पद नै दिने रणनीति अपनाइरहेको छ ।
यस्तो अवस्थामा माओवादी केन्द्र र एस दुवै दल तनावमा देखिएका छन् । उनीहरुमा कांग्रेससँग गठबन्धन गरेर निर्वाचनमा नजाने हो भने आफूहरुको अस्तित्व नै सिद्धिने हो कि भन्ने डर छ । सरकारमा संलग्न दलहरुको पछिल्लो बैठकले प्रधानमन्त्री शेरबहादुर देउवा भारत भ्रमणबाट फर्केपछि गठबन्धनको मोडालिटी बनाउन संयन्त्र नै बनाएर अघि बढ्ने सहमति भएको बताइएको छ । प्रधानमन्त्री देउवाले गठबन्धन गरेर निष्पक्ष निर्वाचन गराउने प्रतिबद्धता जनाएकाले कांग्रेसबाहेकका दलहरुबीचको गठबन्धन तत्कालका लागि अघि नबढ्ने देखिन्छ ।
गत स्थानीय निर्वाचनमा ४० प्रतिशत सिट जितेको एमालेलाई गठबन्धनका दलहरु व्यवस्थित र एक गठ भएर जाने हो भने त्यसका नेताहरुले दाबी गरेजस्तो पहिलो दल बन्न कठिन छ । गठबन्धनका दलहरुबीच पदहरुमा कसरी बाँडफाँड गर्ने भन्ने खाका भने अझै बनेको छैन । कांग्रेसले जितेका अध्यक्ष र प्रमुख त छाड्ने भएन तर जित नजिक भएका अध्यक्ष र प्रमुख तथा उपप्रमुख छाड्ने कि नछाड्ने ? त्यसमा गठबन्धनबीच सहमति हुन कठिन छ ।
उतिबेला कांग्रेस र माओवादीले जितेका स्थान उनीहरुलाई दिने, एमालेले जितेका तह बाँड्ने हो भने पनि एकीकृत समाजवादीको भागमा कति र के दिने भन्ने अन्योल बढ्ने देखिन्छ । यति मात्रै होइन जनता समाजवादी पनि गठबन्धनमा छ । उसको भाग पनि सुविधाजनक खोजिने नै छ । यी सबै कुरा मिलाएर अगाडि बढ्न त्यति सजिलो छैन । यति मात्रै होइन निर्वाचनमा गठबन्धन गरेर त जाने तर एउटा दलका कार्यकर्ताले अर्को दलका उम्मेदवारलाई भोट नहाल्ने सम्भावना कम्ती छैन । पार्टीहरुमा हुनसक्ने यही प्रवृत्तिले आफूलाई लाभ मिल्ने आंकलनमा एमाले देखिएको छ ।
२०७४ को स्थानीय निर्वाचनमा कांग्रेस र माओवादी केन्द्र गठबन्धन त गरे तर कम्युनिष्ट कार्यकताले कांग्रेसका उम्मेदवारलाई भोट हालेनन् । अहिले पनि त्यस्तै अवस्था आउँछ नै, त्यसले कांग्रेसलाई ठूलो घाटा पर्ने कांग्रेसको शेखर कोइराला समूहको भनाइ छ । सो समूहका नेताहरुले गत स्थानीय निर्वाचनमा एमालेभन्दा धेरै ठूलो अन्तर नभएको र हारमा पनि थोरै मत अन्तर भएकाले गठबन्धन कांग्रेसका लागि घातक हुने उनीहरुको आंकलन छ । गठबन्धनका दलहरु सम्मिलित सरकारको नेतृत्वकर्ता भएकाले कांग्रेसले अन्य दलहरुलाई अलपत्र छाड्न भएन । प्रधानमन्त्री देउवा यसैमा अडिग छन् तर कांग्रेस नेतृत्वकर्ताकै हैसियतमा रहने कि औसत दलको अवस्थामा ? उनका लागि यो ठूलो चुनौतीको विषय बन्नेछ ।
अहिलेको अवस्थालाई सर्सर्ती हेर्दा सत्ता साझेदार दलहरुबीचमा प्राविधिक रुपमा गठबन्धन हुने सम्भावना बढी छ । कांग्रेसलाई सकेसम्म भोट नहाल्ने कम्युष्टि शक्ति र उनीहरुलाई विश्वास गर्न नसक्ने कांग्रेस शक्तिबीच प्राविधिक रुपमा चुनावी तालमेल त होला, प्रधानमन्त्री देउवाले कोइराला समूहको कुरालाई कुनै न कुनै रुपमा टालिदिने नै छन् ।
अहिलेको चुरोकुरा भनेको दलहरुका नेता, कार्यकर्तामा इमान्दारिता, हार्दिकता, सद्भाव र नैतिकताको विकास होला कि नहोला ? गठबन्धनलाई यिनै आधारमा व्यवस्थित बनाएर अगाडि बढ्न नसके यी शक्तिबीच द्वन्द्व बढ्ने अवस्था आउनेछ । एकातिर ओलीले संविधानलाई, कानुनी राज्यलाई तारो देख्ने अर्कातिर सत्ता साझेदार दलहरुबीच तिक्तता बढेर आपसी द्वन्द्वको अवस्था आए जनता अन्योलमा पर्नेछन्, देशले हार्नेछ ।
भेषराज पोखरेल
नेपालबहस डटकमका नियमित स्तम्भकार भेष राज पोखरेल वरिष्ठ पत्रकार हुन् । विगत २५ वर्षदेखि अर्थ राजनीतिक धारमा कलम चलाउँदै आएका पोखरेलले कान्तिपुर दैनिकमा २० वर्ष भन्दा बढी समय भाषा सम्पादकका रुपमा काम गरेका छन् । स्वतन्त्र लेखकका रुपमा समेत विभिन्न दैनिक पत्रपत्रिकाहरुमा लेखहरू लेख्दै आएका पोखरेलले दुई वर्ष नेपाल तारा डटकमको सम्पादकको रुपमा काम गरेको अनुभव पनि छ ।
लेखकबाट थपनेपाल भाषा पत्रकारिताको सय वर्ष र मुलुकको मातृभाषा
असार ३, २०८१ सोमबार
कम्युनिष्ट नेताहरू समाजवादका सम्भावना जति सबै नष्ट गरिदिने बाटोमा लागेका हुन् ?
असार १, २०८१ शनिबार
अझै घट्न सकेन उच्च मातृ मृत्युदर
जेठ ३१, २०८१ बिहिबार
त्रिपाठीको कुलपूजामा प्राज्ञ डा. जगमान गुरुङ प्रमुख अतिथि
विनोद त्रिपाठी
असार २, २०८१ आइतबार
नेपालको हारले फ्यानका आँखामा आँसु, टुट्यो सुपर–८ को सपना !
नेपालबहस संवाददाता
असार १, २०८१ शनिबार
सन्दीपको सय विकेट, शतक पूरा गर्ने दोस्रो बलरको कीर्तिमान
असार ३, २०८१ सोमबार
दार्जिलिङ रेल दुर्घटना : मृत्यु हुनेको संख्या १५ पुग्यो
असार ३, २०८१ सोमबार
टीम इन्डियाले सुपर-८ खेलमा कुन कुन टिमसँग भिड्दैछ ?
असार ३, २०८१ सोमबार
मनसुन देशभर फैलन अझै साता दिन लाग्ने !
असार ३, २०८१ सोमबार
सशस्त्र प्रहरीमा दुई डीआईजीलाई स्पष्टीकरण !
असार ३, २०८१ सोमबार
यसवर्षको मनसुनबाट कोशीमा एक लाखभन्दा बढी घरधुरी प्रभावित हुने आकलन
असार ३, २०८१ सोमबार
काठमाडौंमा ‘कनेक्टिङ कर्णाली’ सम्पन्न
असार ३, २०८१ सोमबार
लहानका बस्तीमा डकैतीको अफवाह नफैलाउन र भ्रममा नपर्न प्रहरीको आग्रह
असार ३, २०८१ सोमबार
राष्ट्रपति पौडेल र जर्मनीका समकक्षी स्टाइनमायरबीच भेटवार्ता
असार ३, २०८१ सोमबार