सरकारी पेट्रोल पम्पमा उपभोक्ताको लाइन

१९ चैत, काठमाडौं  ।  निजी पेट्रोल पम्पले पेट्रोलियम पदार्थ वितरण बन्द गरेपछि सरकारी तथा सहकारी पेट्रोल पम्पमा भीड बढेको छ ।

आगामी दिनमा पेट्रोल अभाव हुन सक्ने भन्दै मोटरसाइकल तथा साना सवारी चालक पेट्रोल पम्पमा लाइन लाग्न थालेका हुन् ।

नेपाल आयल निगमसँग विभिन्न माग राख्दै व्यवसायीले पेट्रोलियम पदार्थको ढुवानी देशभर ठप्प बनाएपछि पम्पमा सर्वसाधारणको लाम लागेको हो । अहिले नेपाली सेना, पुलिस र सशस्त्रका पम्पमा सवारी साधनको बाक्लो लाइन लागेको छ।

नेपाल आयल निगमका प्रवक्ता विनितमणि उपाध्यायले समस्या समाधानका लागि वार्ता भए पनि सफल हुन नसकेको बताए । निजी पेट्रोल पम्पले बुझाएको ६ बुँदे मागका विषयमा निगमले वार्ता गरे पनि निष्कर्षमा पुग्न नसकेको उनको भनाइ छ ।

नियमले निजी कम्पनीलाई पेट्रोलियम पदार्थको वितरण नरोक्न माग गरिरहेको उपाध्यायको भनाइ छ । इन्डियन आयल कर्पोरेसनले शुक्रबार निगमलाई पठाएको नयाँ मूल्य सूची अनुसार पेट्रोलको मूल्य घटे पनि एलपी ग्यास, डिजेल, मट्टितेललगायतको मूल्य बढेको छ ।

ग्यास मट्टीतेलमा भएको मूल्यवृद्धिका कारण निगमको घाटा पनि चुलिएको छ। पछिल्लो मूल्य सूची अनुसार निगमको घाटा एक महिनामै १० अर्ब रुपैयाँ पुगेको छ ।