कार्यवाहक प्रधानमन्त्री खाँणको निर्देशनपछि इन्धन आपूर्तिका विषयमा छलफल हुँदै

१९ चैत, काठमाडौं । कार्यवाहक प्रधानमन्त्री बालकृष्ण खाँणले पेट्रोलियम पदार्थमा देखिएको समस्या तत्काल समाधान गर्न पहल नगरे सरकारले कडा कदल चाल्ने चेतावनी दिएपछि सरकारी पक्ष र आन्दोलनरत पक्षबीच छलफल हुने भएको छ । केहीबेर पछि दुबै पक्षबीच समस्या समाधानको छलफल गर्ने तयारी गरिएको छ ।

गृहमन्त्री खाँणको निजि सचिवालयले दिएको जानकारीअनुसार कार्यवाहक प्रधानमन्त्रीको जिम्मेवारी समेत निभाइरहेका खाँणले नेपाल पेट्रोलियम डिलर्स एसोसिएसनका महासचिव विश्व अर्याल, आपूर्ति सचिव गणेश पाण्डे र नेपाल आयल निगमका कार्यवाहक महानिर्देशक वीरेन्द्र गोइतलाई तत्काल वार्तामा बसेर समस्याको समधान खोज्न निर्देशन दिएका छन् ।

खाँणको निर्देशनपछि छलफलको तयारी भएको हो । खाँणले दुबै पक्षसँग तत्काल समस्या समाधान गर्न निर्देशन दिएका हुन् । उनले अत्यावश्यक वस्तुमा समस्या देखिए सरकार नचाहँदा नचाहँदै कठोर हुनपर्ने अवस्था सिर्जना नगराउन चेतावनी दिएको बताइएको छ ।

पेट्रोल ढुवानी तथा बिक्री वितरणमा देखिएको समस्या सुल्झाउन शनिबार साँझ ५ बजेपछि आन्दोलनरत पक्षसँग वार्ता गर्ने तयारी भइरहेको बताइएको छ । पेट्रोलियम पदार्थमा देखिएको समस्या निगमसँग वार्ता गरी टुंग्याउन भनेपछि व्यवसायीहरु  वार्तामा बस्न सहमति भएका छन् ।

व्यवसायी र डिजेल ढुवानीकर्ताहरूले डिजेलको भाउ बढेपछि भाडा पनि बढाइनु पर्ने, डिजेल पेट्रोल बोक्ने ट्यांकरको भाडा बढाइनु पर्नेलगायतका माग राखेर पेट्रोलियम पदार्थ बिक्री वितरण बन्द गरेका छन् ।