भर्चुअल बैठकमा अर्थमन्त्री भने, ‘एमसीसीलाई चाँडो कार्यान्वयनमा लानुपर्छ’

२२ चैत, काठमाडौं । अर्थमन्त्री जर्नादन शर्माले एमसीसी, एमसीए नेपाल, अमेरिकी दूतावास र अर्थ मन्त्रालयका प्रतिनिधिसँगको भर्चुअल छलफलमा अमेरिकी मिलेनियम च्यालेन्ज कर्पोरेसन (एमसीसी) परियोजनाको कार्यान्वयन प्रक्रिया छिटो अघि बढाउनुपर्नेमा जोड दिएका छन् ।

परियोजनाको कार्यान्वयन अवधि छोटिदै गएको भन्दै उनले ढिला नगरी परियोजनालाई कार्यन्वयनमा लानुपर्ने बताए । एकवर्षे कार्यान्वयन अवधिमा धेरै काम गर्न सकिने भन्दै उनले छिटोभन्दा छिटो काम सुरु गर्ने पक्षमा सरकार रहेको र त्यसका लागि एमसीसीले पनि आवश्यक तयारी गर्नुपर्ने बताए ।

संसद्बाट अनुमोदन भएपछि एमसीसी र अर्थमन्त्री शर्माबीच पहिलोपटक बैठक भएको हो । त्यसक्रममा उनले एमसीसी अनुमोदन प्रक्रियामा केही समस्या देखिए पनि कार्यान्वयन चरणमा गएपछि कुनै पनि समस्या आउन नदिने प्रतिबद्धता पनि जनाए ।

एमसीसी विशुद्ध आर्थिक परियोजना भएको विषयमा सरकार स्पष्ट भए पनि विभिन्न कारणले राजनीतिकरण भएको समेत उनले बताए ।