प्रधानमन्त्री देउवालाई देशको आर्थिक अवस्थाबारे अन्तरक्रिया गर्न सुझाव

२२ चैत, काठमाडौं । प्रधानमन्त्री शेरबहादुर देउवालाई देशको आर्थिक अवस्थाका बारेमा राजनीतिक दल, अर्थविद्, योजनाविद् र सरोकारवाला पक्षसँग अन्तरक्रियाको आयोजना गर्न गठबन्धन दलका नेताहरुले सुझाव दिएका छन् । देउवालाई सरकारले बजेट तयारी गरिरहेको अवस्थामा सबै सम्बन्धित क्षेत्रसँग छलफल गर्न भनिएको हो ।

मंगलबार बिहान प्रधानमन्त्रीको सरकारी निवास बालुवाटारमा बसेको सत्ता गठबन्धनका नेताहरूको बैठकमा सो सुझाव दिइएको हो ।

देशको आर्थिक अवस्था संकटग्रस्त भएकाले विज्ञहरूलाई राखेर अन्तरक्रिया गरेर त्यसको वास्तविक अवस्था र त्यसको सुधारका लागि गर्न सकिने के हो, त्यसका बारेमा नेताहरुले प्रधानमन्त्रीको ध्यानाकर्षण गराएका थिए ।

आजको बैठकमा प्रधानमन्त्री देउवाले भारत भ्रमणका विषयमा ‘ब्रिफिङ’ गरेका थिए । समग्रमा भारत भ्रमण सफल रहेको निष्कर्ष पेस भएको बैठकमा सहभागि एक नेताले बताए । सरकारले देशको आर्थिक अवस्थाबारे अन्तरक्रिया गर्ने निर्णय भएको पनि जनाइएको छ ।