कसैलाई जबरजस्ती छैन, मन नलागे प्रतिबद्धतापत्रमा हस्ताक्षर नगरी जान सक्नुहुन्छः थपलिया

२२ चैत, काठमाडौं । निर्वाचन आयोगका प्रमुख निर्वाचन आयुक्त दिनेश थपलियाले निर्वाचन आचारसंहिता प्रतिबद्धतापत्रमा हस्ताक्षर गर्न अनिच्छुक राजनीतिक दललाई हस्ताक्षर नगरी जान भनेका छन् । आचासंहितामाथि साना दलले हस्ताक्षर गर्न असहमति जनाउदै विवाद निकालेपछि उनले यस्तो बताएका हुन् ।

मंगलबारका लागि डाकिएको छलफलका क्रममा विवाद भएपछि प्रमुुख निर्वाचन आयुक्त दिनेश थपलियाले आचारसंहिता कार्यान्वयन गर्ने मिति तोक्नुअघि प्रतिबद्धतापत्रमा हस्ताक्षर गर्ने चलन भएको बताए । उनले कसैलाई सही गर्न मन नभए सही नगरी जान सक्ने भन्दै विवाद नगर्न आग्रह गरेका थिए ।

निर्वाचन आचारसंहिता प्रतिबद्धतापत्रमा हस्ताक्षर गर्न साना राजनीतिक दलले असहमति जनाएपछि बैठकमा केहिबेर होहल्ला समेत भएको थियो । आचारसंहिता प्रतिबद्धतापत्रमा हस्ताक्षर गर्न आयोगले मंगलबार बोलाइएको हो ।

निर्वाचन आयोगमा साना दलहरूले आचारसंहिता बनाउँदा आफूहरूलाई जानकारी नगराएको र हस्ताक्षर मात्रै गर्न बोलाइएको भन्दै ६ दल र निर्वाचन आयोगको सिन्डिकेटबाट आचारसंहिता निर्माण भएको बताएका छन् ।