कविता सुनुवारको हत्या प्रकरणमा दुई जना समातिए

२२ चैत, गाइघाट । उदयपुर बेलका नगरपालिका ३, बुद्धचौककी १५ वर्षीया कविता सुनुवारको रहस्यमय हत्यामा अनुसन्धानका लागि प्रहरीले दुई जनालाई नियन्त्रणमा लिएको छ । उनीहरुको विवरण भने प्रहरीले दिएको छैन ।

इलाका प्रहरी कार्यालय रामपुरकाअनुसार अनुसन्धानका लागि दुई जनालाई केही बेरअघि नियन्त्रणमा लिइएको हो । घटनाको अनुसन्धान भइरहेको र यसै क्रममा दुई जनालाई नियन्त्रणमा लिएको प्रहरीको भनाई छ ।

पक्राउ पर्नेमा एक युवक र एक युवती छन् । उनीहरूमाथि थप अनुसन्धान गर्न अदालतको अनुमति चाहिने भएकाले प्रहरी टोली गाइघाट आएको छ । ट्युसन जान भनेर घरबाट निस्केकी कविता आज बिहान मृत फेला परेकी हुन् ।

यशोधा खोलाको डिलमा काठका मुढाहरू थोपरिएको ठाउँमा घोप्टो परेको अवस्थामा उनको शव फेला परेको थियो ।
उनको हत्या भएको आशंकामा प्रहरीले अनुसन्धान थालेको छ । स्थानीयवासीले हत्या नै भएको भन्दै नाराबाजी गरेका छन् ।

घटनास्थलनजिकै स्थानीय युवा, महिला र विद्यार्थीहरूले हत्यारा पत्ता लगाएर हदैसम्मको कारबाही माग गर्दै प्रदर्शन गरिरहेका छन् । स्थानीय श्री कोसी जनता उच्च मावि रामपुरमा कक्षा १० मा पढ्ने कविता बुद्धचौककी हुन् ।