ललितपुर महानगरमा कांग्रेसभित्रै मेयरका आकांक्षी मिलाउन कठिन, महर्जनपछि न्याछ्योँकाे दावी

२३ चैत, ललितपुर ।  नेपाली कांग्रेसभित्रैबाट मेयरका आकांक्षीले दावी नछाड्ने अडान लिएपछि ललितपुर महानगरपालिकाको मेयर र उपमेयर सिफरिसमा तनाव देखिएको छ । केन्द्रबाटै मेयर र उपमेयरबारे निर्णय हुने भएपछि गठबन्धन दलहरुकैबीचमा पनि अहिले सम्म सहमतिको विन्दु भेटिएको छैन ।

पटक पटक जिल्ला तहमा गठबन्धनबीच भएको छलफलले सहमति कायम गर्न नसकेपछि कांग्रेसबाट मेयरका आकांक्षीहरु केन्द्रतिरै धाउन थालेका छन् । अघिल्लो स्थानीय तहको चुनावदेखि ललितपुर महानगरको मेयरका लागि दौडधुप गर्दै आएका भरतलाल न्याछ्योँले ललितपुरमा प्रमुख र उपप्रमुख दुवैमा कांग्रेसको दावी रहेको बताए ।

उनले भने, ‘ललितपुरमा नेकपा एकिकृत समाजवादीको ठूलो दावी छैन । नेकपा माओवादी केन्द्रले दावी गर्दै आएपनि अहिले सम्म प्रतिस्पर्धामा जान सक्ने व्यक्ति भेटिएको छैन । तर, उसले दावी गरिरहेको छ । गठबन्धनमा छलफल भएपनि कुनै सहमतिको विन्दु भेटिएको छैन । अहिलेसम्म कांग्रेसबीचमै टिकटका लागि मारामार छ । मैले अघिल्लो पट छाडेको हुँ, यो पटक मैले पाउनुपर्छ ।’

आकांक्षी धेरै हुँदा दलहरुभित्र पनि उम्मेदवार चयनको विषय सहज छैन । २०७४ सालमा सम्पन्न स्थानीय तहको निर्वाचनमा ललितपुर महानगरपालिकामा कांग्रेसले प्रमुख र उपप्रमुख (मेयर र उपमेयर) पदमा जितेको थियो । यसपटक पनि कांग्रेसले ललितपुर महानगरको नेतृत्व आफ्नै पोल्टोमा पार्ने दावी गरेको छ तर उम्मेदवार को हुने भन्ने विषय भने निकै पेचिलो बनेको छ ।

महानगरपालिको मेयर पार्टीको केन्द्रबाटै सिफारिस हुने भएकाले ललितपुरको मेयरको उम्मेदवार कसलाई बनाउने भन्ने चर्चा र चासो कांग्रेसभित्र व्यापक छ र टिकट हात पार्न नेतृत्वका आकांक्षीहरुको दौडधुप उस्तै छ ।

कांग्रेसभित्रै मेयरका लागि अहिलेसम्म करिव आधा दर्जन नेताहरु दौडधुपमा छन् । अहिलेका मेयर चिरिबाबु महर्जनको पनि दावी कायमै छ । पार्टीभित्र पनि उनीपछि भरतलाल न्याछ्यौँ देखिएका छन् भने प्रेमकृष्ण महर्जन, राजेश महर्जन, उपमेयर गिता सत्यालको पनि दावी कायमै छ ।

मेयरका दावेदार प्रेमकृष्ण महर्जन २०५४ सालको स्थानीय निकायको निर्वाचनमा उपमेयरको उम्मेदवार र २०७४ सालमा भएको प्रदेशको निर्वाचनमा ललितपुर क्षेत्र नं २ ‘ख’ को उम्मेदवार थिए । तर, पराजित भए ।

यसपटक पनि कांग्रेसले ललितपुर महानगरको नेतृत्व आफ्नै पोल्टोमा पार्ने दावी गरेको छ तर उम्मेदवार को हुने भन्ने विषय भने निकै पेचिलो बनेको छ ।

प्रेमकृष्णले दुइपटक अवसर पाएर पनि जित्न नसकेको भन्दै चिरीबाबुको विकल्पका रूपमा भरतलाल न्याछ्योँंले मेयरका लागि आफुलाई अगाडी सारेका छन् ।

न्याछ्यों ललितपुर जिल्लामा पुराना र बौद्धिक नेता मानिन्छन् । २०३६ सालदेखि आफू प्रजातान्त्रिक आन्दोलनमा लागेको बताउने न्याछ्यों २०४९ साल असोज २० गते कांग्रेस जिल्ला कार्यसमितिको सहसचिव, पार्टीको नवौं महाधिवेशनपछि २०५२ साल र १२औं महाधिवेशनपछि २०६७ सालमा गरी दुईपटक नगरसभापतिको जिम्मेवारी समेत सम्हाली सकेका छन् ।

यसअघि पनि इच्छा देखाएका नाछ्योंले सहमतिमै चिरिबाबुलाई छाडेका थिए । अर्का आकांक्षी राजेश महर्जन पनि नगरसभापति भैसकेका छन् । उनी पेशाले कानून व्यवसायी हुन् ।

२०४८ सालमा नेवीसंघबाट राजनीति सुरुवात गरेका राजेश नगर सचिव , ललितपुर क्षेत्र नम्वर २ को क्षेत्रीय सचिव र ललितपुर महानगरको सभापतिको जिम्मेवारी समेत सम्हालेका छन् । उनी अहिले कांग्रेस बागमति प्रदेश सदस्यको जिम्मेवारीमा छन् ।

मेयर चिरिबाबु महर्जनले पनि दोहोरिने इच्छा देखाएका छन् । कोरोनाका कारण कतिपय योजना गर्न नसकिएको बताए । उनले फेरि मेयर भएर अधुरा काम गर्ने आफ्नो योजना रहेको बताएका छन् ।

२०७४ सालको स्थानीय तहको निर्वाचनमा महर्जनले नेकपा एमालेबाट मेयरका उम्मेदवार हरिकृष्ण व्यन्जनकारलाई ३२६ मतले पराजित गरेका थिए ।

उपप्रमुख गीता सत्यालले पनि मेयरमा दावी गरेकी छन् । उपप्रमुखका रुपमा अनुभव हासिल गरेकाले मेयरमा आफ्नो दावी स्वभाविक भएको उनको भनाई छ । अहिले गठबन्धन रहेकाले यो महानगर कांग्रेसका लागि सहज देखिएको छ ।