एडीबीको प्रक्षेपणः नेपालको आर्थिक वृद्धिदर ३.९ र मुद्रास्फिती ६.५ प्रतिशत

२३ चैत, काठमाडौं ।  एसियाली विकास बैंक (एडीबी)ले यस आर्थिक वर्षमा आर्थिक वृद्धिदर ३.९ प्रतिशत रहने अनुमान गरेको छ । कोभिड–१९ विरुद्ध खोपको विस्तारसँगै आर्थिक गतिविधि पनि बढेकाले यो वर्ष आर्थिक वृद्धिदर अघिल्ला वर्षहरूको तुलनामा सुधार हुने भएको हो ।

अघिलो आर्थिक वर्षमा आर्थिक वृद्धिदर २.३ प्रतिशतले विस्तार भएको छ भने त्यसअघि २०७६–७७ मा २.१ प्रतिशतले ऋणात्मक भएको थियो । त्यस्तै, आगामी वर्ष ५ प्रतिशतले आर्थिक वृद्धिदर हुने एडीबीको अनुमान छ ।

मुद्रास्फिति भने यस आर्थिक वर्षमा ६.५ प्रतिशत र आगामी वर्ष ६.२ प्रतिशत रहने एडीबीको प्रक्षेपण छ । विश्व आर्थिक परिदृश्य सार्वजनिक गर्दै एडीबीले नेपालमा कृषि क्षेत्रमा भने १.३ प्रतिशतमात्र आर्थिक वृद्धिदर हासिल हुने, औद्योगिक षेत्रमा ४.१ र सेवा क्षेत्रमा ५.२ प्रतिशतले विस्तार हुने उल्लेख गरेको छ ।

महामारीपछि थोक र खुद्रा व्यापारमा समान्यीकरण, यातायात, वित्तीय क्षेत्रमा सुधारले आर्थिक वृद्धिलाई बढावा दिने एडीबीले उल्लेख गरेको छ । यद्यपि, अन्तर्राष्ट्रिय बजारमा तेलको मूल्य वृद्धिसँगै हवाई यातायातको भाडा अत्याधिक बढेकाले पर्यटक आवागमन प्रभावित भैरहने बताइएको छ ।