निर्वाचन तयारी र आचारसंहिताबारे प्रधानमन्त्रीले निर्वाचन आयोगका पदाधिकारीसँग छलफल गर्ने

२३ चैत, काठमाडौं । निर्वाचन आयोगबाट जारी भएको निर्वाचन आचारसंहितमा दलहरुले उठाएको विवाद र स्थानीय तहको निर्वाचनको तयारीबारे जानकारी लिन प्रधानमन्त्री शेरबहादुर देउवाले बुधबार निर्वाचन आयोगका पदाधिकारीहरुसँग छलफल गर्ने भएका छन् ।

निर्वाचन आयोगले मंगलबार निर्वाचनमा भागलिने दलहरुलाई आयोगमा डाकेर आचारसंहिताप्रति प्रतिबद्धता जनाउन भनेको थियो । सोही क्रममा केही साना राजनीतिक दलहरुले विरोध जनाउँदै होहल्ला गरेका थिए भने प्रमुख प्रतिपक्षी दल नेकपा एमाले पनि हस्ताक्षर नगरी बाहिरिएको थियो ।

प्रधानमन्त्री देउवाका प्रेस सल्लाहकार गोविन्द परियारले आयोगका पदाधिकारीसँग छलफल गर्ने भनिए पनि समय तय नभएको र साँझतिर हुनसक्ने बताए । प्रधानमन्त्रीले निर्वाचन तयारीबारेमा जानकारी लिन आयोगका पदाधिकारीसँग छलफलमा बोलाएका आयोग स्रोतको दावी छ ।

आयोगले जारी गरेको आचारसंहितमा आसन्न स्थानीय तहको निर्वाचनमा प्रधानमन्त्री र मन्त्रीहरूले समेत भोट माग्न नपाउने उल्लेख । निर्वाचन आचारसंहिता–२०७८ ले प्रधानमन्त्री, मन्त्री वा सार्वजनिक पद धारण गरेको कसैले पनि आफ्नो पार्टी वा पार्टीको उम्मेदवार वा अन्य उम्मेदवारका लागि भोट माग्न नपाउने व्यवस्था गरेको र यसमा दलहरुले असहमति राखेका छन् ।

आजको छलफलमा यसबारे पनि प्रधामन्त्रीले बुझ्ने र सच्याउन आग्रह गर्ने बुझिएको छ । आचारसंहिताको यो व्यवस्थाबमोजिम आसन्न निर्वाचनमा संघीय सरकारका मन्त्री, प्रदेश सरकारका मुख्यमन्त्री, मन्त्री एवम् सार्वजनिक पद धारण गरेको व्यक्तिले चुनावी सभामा भाग लिन र उम्मेदवारको लागि भोट माग्न नपाउने भएपछि यसले अप्ठ्यारो परेको दलहरुले बताएका छन् ।