पाँचदलीय गठबन्धन कुहिएको फल हो, संयुक्त उम्मेदवारी दिने बेलामै टुट्छः ओली

२३ चैत, भक्तपुर । नेकपा एमालेका अध्यक्ष केपी शर्मा ओलीले अहिलेको पाँच दलीय गठबन्धन निर्वाचन अघिनै छिन्नभिन्न हुने दावी गरेका छन् । उनले कुनै आधार र सामिप्यता समेत नभएर फगत पद र अवसरका आधारमा मात्रै यो गठबन्धन बनेकोले यसको हैसियत भेट्नु कुहेको फल जस्तै भएको बताएका छन् ।

बुधबार भक्तपुरको सूर्यविनायक नगरपालिका–८ सिपाडोलस्थित शान्ति निकेतन माविको भवन उद्घाटन तथा हस्तान्तरण कार्यक्रममा ओलीले अहिलेको पाँंचदलीय गठबन्धन कुहिएको गठबन्धन भएको बताए । यो गठबन्धन कुहिसकेकाले चाँंडै टुट्ने उनको दाबी छ ।

ओलीले भने, ‘जसरी फल कुहिनेवित्तिकै झर्दैन र केही समय लाग्छ, यो गठबन्धनको हालत पनि यस्तै भइसक्यो । कुहिएको फल छुट्न थालेसँंगै गठबन्धन छुट्न थाल्छ ।’ उनले गठबन्धन किन टुट्छ भन्ने विषयमा निर्वाचनमा संयुक्त उम्मेदवारी दिने बेलामा गठबन्धन टुटने आशय व्यक्त गरे ।

ओलीले अबको निर्वाचनपछि विकासको लहर सुरु हुने दाबी पनि गरे । चुनावपछि एमाले विजयी हुने र त्यसपछि शिक्षा, स्वास्थ्य सबैमा विकासको लहर चल्ने उनको भनाइ थियो । विद्यार्थीलाई देशभक्तिबारे अहिलेदेखि नै सिकाउनुपर्ने आवश्यकता रहेको उनले औंल्याए ।

स्थानीय निर्वाचन आउन लागेको र सबै घोषणापत्र लिएर आउने भन्दै उनले अरुको घोषणापत्र हावाको हुने सुनाए । ‘मेरो टेम्पो उड्यो भने म तपाईलाई जापान उडाइदिन्छु भन्ने प्रकारको अरुको घोषणापत्र हुन्छ,’ उनले भने, ‘जबकि न ट्याम्पो उड्छ न त जापान नै जान पाइन्छ ।’ एमालेको घोषणापत्र जनतासँंग मिलेर गर्नसक्ने कुराहरू राखेर मात्र बनाइने उनले दाबी गरे ।