आयोगको अर्थ मन्त्रालयलाई पत्र, कुनै कुराले निर्वाचन सुरक्षामा प्रभाव नपारोस

२४ चैत, काठमाडौं ।  निर्वाचन आयोगले आगामी स्थानीय तहको निर्वाचन सुरक्षार्थ खटिने सुरक्षाकर्मीका लागि आवश्यक स्रोतसाधन उपलब्ध गराउन अर्थमन्त्रालयलाई निर्देशनात्मक पत्र पठाएको छ । सुरक्षा निकायबाट अघिल्लो निर्वाचनका समयमा पनि समयमै आवश्यक स्रोतसाधन नपाएर समस्या भएको गुनासो गरेपछि आयोगले पत्र लेख्दै अर्थलाई समयमै उपलब्ध गराउन भनेको हो ।

निर्वाचन सुरक्षा समितिको बैठकमा सुरक्षा निकायका अधिकारीहरुले पुराना स्रोतसाधनको भरमा निर्वाचन गराउन कठिन हुने र गएको निर्वाचनमा प्रयोग भएका प्राय काम नलाग्ने अवस्थामा रहेको जानकमरी गराएका थिए ।

आयोगकाअनुसार सुरक्षाकर्मीलाई पेट्रोलिङका लागि सवारीसाधनको अभाव समेत रहेको र भएका सवारीसाधन कतिपय कामै नलाग्ने अवस्थामा पुगेको गुनासो बैठकमा आएको थियो ।

निर्वाचनमा मतदान केन्द्र, त्यसबाहिर र नजिकको क्षेत्रमा गरी तीन तहको सुरक्षा घेरा बनाइएको छ । सुरक्षा समसतको छलफलमा निर्वाचन आयोगका प्रतिनिधिले स्रोतसाधनको अभाव हुन नदिन सरकारको ध्यानाकर्षण गराउने बताएका थिए ।
सुरक्षा निकायलाई आवश्यक पर्ने सवारीसाधन, उपकरण, हातहतियार लगायतका विषयमा केन्द्रिय निर्वाचन सुरक्षा समितिको बैठकमा छलफलपछि निर्वाचन आयोगका आयुक्तहरुको बैठकबाट अर्थलाई पत्र लेख्ने निर्णय भएको थियो । स्थानीय तहको निर्वाचन आउन अब ३६ दिन बाँकी छ ।