भरतपुर नछाड्ने दवाव लिएर काठमाडौं आएको टोलीले पौडेल भेट्यो, देउवा भेट्दै

२४ चैत, काठमाडौं ।  शीर्ष नेताहरुलाई दवाव दिन काठमाडौं आएको नेपाली कांग्रेस चितवनको टोलीले गठबन्धन कार्यदलका संयोजक रामचन्द्र पौडेललाई भेटेर भरतपुर महानगरपालिकाको मेयर नछाड्न दबाब दिएको छ । टोली बुधबार काठमाडौं आएको थियो ।

टोलीले पैडेलपछि प्रधामन्त्री समेत रहेका पार्टी सभापति शेरबहादुर देउवलाई भेट्ने कार्यक्रम रहेको कांग्रेस चितवनका सभाापति राजेश्वर खनालले बताए । देउवालाई भेटेर भरतपुर महानगरपालिकाको मेयर कुनै पनि हालत छाड्न नहुने दवाव दिने खनालको भनाई छ ।

टोलीले कांग्रेसका नेता, शेखर कोइराला लगायतका नेताहरुसँग पनि भेटने कार्यक्रम राखिएको जनाएको छ । टोलीमा कांग्रेस केन्द्रीय सदस्य दिनेश कोइराला, टेकप्रसाद गुरूङ, कांग्रेस जिल्ला सभापति राजेश्वर खनाल, नेता जगन्नाथ पौडेललगायत छन् ।

उनीहरुले पौडेललाई भेटेर महानगर मेयर नछाड्ने बटमलाइनसहितको कांग्रेस जिल्ला कार्यसमिति चितवनको सर्वसम्मत निर्णय बुझाएका छन् । २०७४ को चुनावमा कांग्रेस र माओवादीले भरतपुरको मेयर र उपमेयरमा मात्र गठबन्धन गरेका थिए ।