शुक्रबारदेखि उपकार लघुवित्तको आईपीओमा आवेदन दिन पाइने, कति कित्ताको लागि दिने आवेदन ?

२४ चैत, काठमाडौं । भोलि शुक्रबारदेखि उपकार लघुवित्तले सर्वसाधारण लगानीकर्ताको लागि आईपीओ बिक्रीमा ल्याउदैछ । लघुवित्तले १०० अंकित मूल्यमा चैत २५ गतेदेखि आईपीओ निष्कासन गर्न लागेको हो ।

लघुवित्तले जारी पूँजी ६ करोड ५६ लाख २५ हजार रुपैयाँ को ३६ प्रतिशतले हुन आउने २ करोड ३६ लाख २५ हजार रुपैयाँ बराबरको प्रतिशेयर १०० अंकितमूल्यका २ लाख ३६ हजार २५० कित्ता साधारण शेयर निष्काशन गर्न लागेको हो।

निष्काशन गरिने कुल शेयरमध्ये ०.५ प्रतिशत अर्थात ३ हजार २८१ कित्ता शेयर लघुवित्तका कर्मचारीहरुका लागि सुरक्षित गरिएको छ भने ५ प्रतिशत अर्थात ११ हजार ८१३ कित्ता शेयर सामूहिक लगानी कोषहरुलाई बाँडफाँट गरिएको छ। सर्वसाधारण लगानीकर्ताले बाँकी रहेको २ लाख २१ हजार १५६ कित्ता शेयरका लागि आवेदन दिन सक्नेछन्।

कम्पनीले बिक्रीमा ल्याउने आईपीओमा चैत २९ गतेसम्म आवेदन दिन सकिनेछ । आईपीओमा नेपाल धितोपत्र बोर्डबाट स्वीकृतिप्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ। यसका साथै मेरो शेयरको वेब तथा एपबाट पनि सो आईपीओका लागि आवेदन दिन सकिनेछ।

लघुवित्तको शेयर निष्काशन तथा बिक्री प्रबन्धक नेपाल एसबिआई बैंकिङ्ग लिमिटेड रहेको छ। लगानीकर्ताले न्यूनतम १० कित्ता शेयर खरिदका लागि आवेदन दिनुपर्नेछ भने अधिकतममा १ हजार कित्ताका लागि आवेदन दिन सक्नेछन्।

कति कित्ताको लागि दिने आवेदन ?

उपकार लघुवित्तले सर्वसाधारणको लागि छुट्याएको २ लाख २१ हजार १५६ कित्ता नेपाल धितोपत्र बोर्डको निर्देशिका अनुसार गोलाप्रथा मार्फत बाँडफाँड हुँदा २२ हजार ११५ जना सर्वसाधारण आवेदकले १० कित्ताको दरले आईपीओ पाउनेछन् ।

कम्पनीले आईपीओ बाँडफाँड गर्दा ६ कित्ता भने एक्स्ट्रा हुन जान्छ । एक्स्ट्रा कित्ता आईपीओ पाउने ६ जनालाई १ कित्ताको दरले थपेर ११ कित्ता आईपीओ दिने व्यवस्था छ । यद्दपी कम्पनीको आईपीओ ६ जनाले ११ कित्ताको दरले पाउने भएकाले सर्वसाधारण लगानीकर्ताले २० कित्ताको लागि आवेदन दिदा उपयुक्त हुने देखिन्छ ।