नेप्से परिसूचकसँगै बढ्यो कारोबार रकम

२४ चैत, काठमाडौं । साताको अन्तिम कारोबार दिन बिहीबार नेपाल स्टक एक्सचेन्ज (नेप्से) दोहोरो अंकले उकालो लागेको छ । बिहीबार नेप्से ३५ दशमलब ६६ अंकले बढेर २४६४ दशमलब ३१ बिन्दुमा आएर बजार बन्द भएको छ ।

बिहीबार कारोबार रकम पनि बढेको छ। बुधबार १ अर्ब ९९ करोड बराबरको कारोबार भएको थियो । आज भने २२२ वटा कम्पनीको शेयर कारोबार हुँदा २ अर्ब १२ करोड बराबरको भएको छ। क्रमिक रुपमा घटिरहेको बजार बिहीबार दाहोरो अंकले बढेको छ ।

यस दिन नेष्डो समृद्ध लघुवित्त र हिमालयन पावर पाटर्नर कम्पनीको शेयरमा सकारात्मक सर्किट लागेको छ । यी दुई वटै कम्पनीको शेयरमूल्य १० प्रतिशतले बढेको हो ।  नेष्डो समृद्ध लघुवित्तको शेयरमूल्य १० प्रतिशतले बढेर १७०० रुपैयाँ, हिमालयन पावर पाटर्नर कम्पनीको शेयरमूल्य १० प्रतिशतले बढेर प्रतिकित्ता शेयरमूल्य ४६२ रुपैयाँ पुगेको छ ।

कारोबारमा आएको राष्ट्र उत्थान लघुवित्तको शेयरमूल्य यस दिन सर्वाधिक ७.७१ प्रतिशत घटेको छ। त्यस्तै, यस दिन इमर्जिङ्ग नेपालको शेयरमूल्य ६.६१ प्रतिशत घटेको छ भने सर्पोट माइक्रोफाइनान्सको शेयरमूल्य २ प्रतिशत घटेको छ।

कारोबार रकमका आधारमा यस दिन नबिल बैंक शीर्ष स्थानमा रहेको छ। सो बैंकको यस दिन ७ करोड ३८ लाख ९५ हजार रुपैयाँ बराबरको शेयर खरिदबिक्री भएको छ। त्यस्तै, यस दिन प्राइम कमर्सियल बैंक र हिमालयन डिष्टिलरीको ६ करोडभन्दा बढीको शेयर कारोबार भएको छ।

बिहीबार १३ वटै उपसमूहको परिसूचक बढेका छन्। जसमध्ये अन्य उपसमूहको परिसूचक सर्वाधिक ३.५९ प्रतिशत बढेको छ। त्यसैगरी, यस दिन व्यापार उपसमूहको परिसूचक २.६२ प्रतिशत बढेको छ भने बैंकिङ्ग, होटल, विकास बैंक, जलविद्युत, वित्त, लघुवित्त, जीवन बीमा र लगानी उपसमूहको परिसूचक १ प्रतिशतभन्दा बढी बढेका छन्।