संस्थागत क्षमता स्वमूल्याङ्नमा स्याङ्जाको वालिङ प्रदेश प्रथम

♦ प्रकाश डोटेल

२४ चैत, स्याङ्जा । संघीय मामिला तथा सामान्य प्रशासन मन्त्रालय अन्तर्गत स्थानीय तह संस्थागत क्षमता स्वमूल्याङ्कन (लिजा) को नतिजा सार्वजनिक भएको छ । स्थानीय तह संस्थागत क्षमता स्वमूल्याङ्नमा स्याङ्जाको वालिङ नगरपालिका देश भरमा दोस्रो र गण्डकी प्रदेशका स्थानीय तहमा पहिलो भएको हो ।

मन्त्रालयले प्रकाशन गरेको स्थानीय तह संस्थागत क्षमता स्वमूल्याङ्कन (लिजा) को नतिजामा स्याङ्जाको वालिङले ९५ अंक प्राप्त गर्दै दोस्रो भएको हो भने फेदिखोला गाउँपालिका ९२.७५ अंक प्राप्त गरि चौंथो भएको छ । तेस्रो स्थानमा रहेको गुर्भाकोट नगरपालिका सुर्खेतले ९३.२५ अंक प्राप्त गरेको छ ।

संघीय मामिला तथा सामान्य प्रशासन मन्त्रालयले सार्वजनिक गरेको नतिजामा धादिङको निलकण्ठ नगरपालिका ९७ अंक प्राप्त गरि उत्कृष्ट भएको छ । मन्त्रालयले देशका ७५३ पालिका मध्ये लिजा प्रणालीमा प्रविष्ट भएका ६९९ पालिकाको आर्थिक वर्ष ७७÷७८ को नतिजा सार्वजनिक गरेको हो ।

जिल्लाका पालिकाहरूको स्थानीय तह संस्थागत क्षमता स्वमूल्याङ्कन नतिजा अनुशार पुतलीबजार नगरपालिका तेस्रोमा छ । पुतलीबजार नगरपालिकाले ८२.५ अंक प्राप्त गरेको छ भने आँधीखोला गाउँपालिकाले ७९ अंक प्राप्त गरेको छ । भीरकोट पाँचौ स्थानमा छ भीरकोटले ७७.७५ अंक प्राप्त गरेको छ ।

स्याङ्जाकै हरिनास गाँउपालिका ६५.५ अंक, कालीगण्डकी गाँउपालिका ६४.२५ अंक, गल्याङ नगरपालिका ६२.२५ अंक, बिरुवा गाँउपालिका ६०.७५ अंक र चापाकोट नगरपालिकाको ४९.७५ अंक रहेको छ ।

मन्त्रालयले शासकीय प्रबन्ध, संगठन तथा प्रशासन, वार्षिक बजेट तथा योजना व्यवस्थापन, वित्तीय एवं आर्थिक व्यवस्थापन, सेवा प्रवाह, न्यायिक सम्पादन, भौतिक पूर्वाधार, सामाजिक समाबेशीकरण, वातावरण संरक्षण र सहकार्य र समन्वय गरी दशवटा विषय क्षेत्रलाई समेटेर तयार पारिएको ६९९ पालिकाको स्वमूल्याङ्कन नतिजा मन्त्रालयले हालै सार्वजनिक गरेको जनाएको छ ।