अमेरिकाबाट आएको डलर फुकुवा गर्न राष्ट्र बैंकबाट ३० हजार डलर मागियोः अर्थमन्त्री शर्मा

२५ चैत, काठमाडौं । अर्थमन्त्री जनार्दन शर्माले व्यवसायी पृथ्वी शाह र उनको परिवारको खातामा अमेरिकाबाट आएको १२ लाख डलर फुकुवा गर्न राष्ट्र बैंकका सञ्चालक समितिका एक सदस्यले ३० हजार डलर बार्गेनिङ गरेको बताएका छन् ।

शर्माले भने, ‘म सँग प्रमाण त छैन, तर ३० लाख रुपैयाँ (३० हजार डलर) बार्गेनिङ गरिएको भन्ने सुनेको छु ।’ उनले आज राजधानीमा आयोजित सार्वजनिक कार्यक्रममा आधिकारिक कुरा थाहा नभए पनि सुनेको बताए ।

अछामका पृथ्वी शाहले अर्थमन्त्रीसँग सम्पत्ति शुद्धीकरण विभागले कसुर स्थापित हुने आधार नभएकोले बैंकबाट रकम फुकुवा गर्न अनुरोध गरेका आधारमा आफूले राष्ट्र बैंकलाई खातामा रोक्का रकम फुकुवा गर्न लेखिपठाएको अर्थमन्त्री शर्माले स्वीकार गरेका छन् ।

नेपाल राष्ट्र बैंकले आयोजना गरेको ’नेसनल कन्फ्रेन्स अन इकोनमिक्स एण्ड फाइनान्स’ विषय कार्यक्रममा बोल्दै उनले राष्ट्र बैंकका गोप्य सूचनाहरु राष्ट्र बैंककै उच्च अधिकारीहरुले मिडियामा दिने गरेको आरोप पनि लगाए ।

शर्माले भने ’मिडिया खोजेर त्यहाँ गोप्य कुराहरु पुर्याइन्छ किन ? यस्तै अनुशासन हुन्छ? कतिपय सूचनाहरु हुन्छन् रिपोर्ट गर्नुपर्ने रिपोर्ट हुँदैनन्,’ उनले भने, ’बदमासी भइराखेको छ, एउटा सञ्चालक समितिले बार्गेनिङ गरेको सुनेको छु आधिकारिक कुरा थाहा छैन मलाई । ३० हजार डलर चाहियो भनेर बार्गेनिङ गरेको सञ्चालक समिति सदस्यले ।’