गठबन्धनलाई छिर्न नदिने कांग्रेस विराटनगरको निर्णय

२५ चैत, विराटनगर । नेपाली कांग्रेस विराटनगर महानगर समितिले आगामी स्थानीय चुनावमा विराटनगरमा कुनै पनि गठबन्धन नगर्ने निर्णय गरेको छ । विराटनगरमा कुनै पनि किसिमको गठबन्धनको आवश्यकता नभएको नगर सभापति दीपक चापागाईले बताए ।

उनले विराटनगरमा १९ वटा वडा तहसम्मै गठबन्धन नहुने भन्दै केन्द्रले स्थानीय अवस्था हेरेर तालमेल गर्ने निर्णय गरिसकेकाले विराटनगरको विषयमा निर्णय नमिल्ने बताए । विराटनगरमा वडातहसम्मकै उम्मेदवारको नामावली संकलन र सिफारिसको काम भइरहेको छ ।

हालसम्म १९ वटा वडामध्ये एउटा वडा १८ नम्बरबाहेक सबैको नामावली सिफारिस भएको छ । ०७४ सालको निर्वाचनमा विराटनगरमा काँग्रेसले १९ नम्बर वडासहित ८ वटा वडा जितेको छ भने संघीय समाजवादी फोरमले ६, एमालेले ३, माओवादीले १ र स्वतन्त्र उम्मेदवार १ जनाले निर्वाचन जितेका थिए ।