गठबन्धनले तालमेलबारे संयुक्त आव्हान गर्ने, पौडेल नेतृत्वको समितिमा वक्तव्यको ढाँचा तयार हुँदै

२५ चैत, काठमाडौं ।  बालुवाटारमा बसेको सत्ता गठबन्धनको बैठकले स्थानीय तहको निर्वाचनका विषयमा संयुक्त वक्तब्य जारी गर्ने सहमति गरेको छ । अहिले जारी हुने वक्तब्यको ढाँचा तयार भइरहेको छ । केहीबेरमा जारी गर्ने तयारी गठबन्धनको छ ।

पाँच दलले स्थानीय चुनावमा देशव्यापी तालमेलको आह्वान गर्दै जारी गर्ने संयुक्त विज्ञप्ति रामचन्द्र पौडेलको संयोजकत्वमा बनेको कार्यदलले तयार गर्दैछ । विज्ञप्ती तयार भएपपिछ गठबन्धन दलका शीर्ष नेताको हस्ताक्षरसहित देशव्यापी तालमेल गर्न आव्हान गर्दै संयुक्त वक्तब्य जारी हुनेछ ।

गठबन्धनमा आवद्ध दलका नेताहरुबीच शुक्रबार बिहान बालुवाटारमा भएको अनौपचारिक छलफलमा पनि संयुक्त वक्तव्य जारी गर्नेबारे नेताहरुबीच छलफल भएको थियो । छलफलमा काँग्रेस सभापति एवं प्रधानमन्त्री शेरबहादुर देउवा, माओवादी अध्यक्ष प्रचण्डका साथै कृष्णप्रसाद सिटौला र पूर्णबहादुर खड्का लगायतको सहभागिता थियो । बैठकमा एकीकृत समाजवादीका नेता झलनाथ खनालको पनि सहभागिता थियो ।

सत्ता गठबन्धनले ६ वटा महानगरपालिका र ११ उपमहानगरपालिकामा मेयर र उपमेयरहरुको उम्मेदवारी केन्द्रबाटै टुंगो लगाउने र बाँकी स्थानीय तहमा मातहतका पार्टी कमिटीले उम्मेदवार तय गर्नेगरी यसअघि नै निर्णय गरिसकेका छन् ।