मोरङमा कांग्रेसलाई सत्ता गठबन्धनमा रहेका दलबाटै चुनौती

२५ चैत, विराटनगर । नेपाली कांग्रेस मोरङ नगर समितिले गठबन्धन नगरी एक्लै चुनाव लड्ने निर्णय गरेपछि कांग्रेसबाहेकका दलले गठबन्धन गरी चुनावमा जान छलफल सुरु गरेका छन् ।

उनीहरुले कांग्रेस एक्लै जाने भए बाँकी रहेका ४ दलको गठबन्धर बनाएर उम्मेदवारी दिने भएका छन् ।

मोरङ कांग्रेसले आफ्नो धारणा सार्वजनिक गरेपछि नेकपा माओवादी केन्द्र, जनता समाजवादी पार्टी र नेकपा एकीकृत समाजवादीले कांग्रेससँग तालमेल नगरी चुनाव लड्नेबारे छलफल गरेका हुन् ।

कांग्रेसले तालमेल नगरे आफूहरु मिलेर जाने विषयमा छलफलका सहभागी नेताहरुले सुझाव राखेको बताइएको छ । शुक्रबार उनीहरुबीच सम्भावित तालमेलको विषयमा छलफल भएको छ ।

तालमेल गर्ने विषयमा मोरङमा कांग्रेसले चासो नदिएपछि सरकारमा रहेका गठबन्धन दलले अलग्गै संभावना खोजी गर्दै छलफल शुरु गरेको बताइएको छ । मोरङ कांग्रेसले आफूले जितेको ठाउँमा तालमेल नहुने जनाएको छ ।

२०७४ को स्थानीय चुनावमा मोरङका १७ मध्ये १० पालिकामा जितेको थियो । विराटनगर महानगर र सुनवर्षी नगरपालिका समितिले तालमेल गरेर चुनावमा नजाने निर्णय गरिसकेका छन् । यसमा कांग्रेसभित्र विवाद देखिएको छ ।