गण्डकी प्रदेश सरकारद्वारा खेलकुद र स्वास्थ्यका १४७ पदाधिकारी बर्खास्त

२५ चैत, पोखरा । गण्डकी प्रदेश सरकारले खेलकुद र स्वास्थ्यका गरी १४७ जना पदाधिकारी बर्खास्त गरेको छ । बुधबार बसेको मन्त्रिपरिषद बैठकले उनीहरुलाई बर्खास्त गरेको हो ।

शुक्रबार मन्त्रिपरिषदको निर्णय सुनाउँदै सरकारका प्रवक्ता तथा भौतिक पूर्वाधार विकास मन्त्री कुमार खड्काले ११ जिल्लाका खेलकुदका पदाधिकारी र संक्रामक तथा सरुवा रोग अस्पताल व्यवस्थापन समितिका पदाधिकारी बर्खास्त गर्ने निर्णय गरेको जानकारी दिए ।

प्रदेश खेलकुद विकास परिषदका अनुसार हरेक जिल्लामा १३ सदस्यीय खेलकुद समिति मनोनित गरिएको थियो । ती सबै ११ जिल्लाकै १४३ पदाधिकारी र अस्पतालका चार जनासहित कुल १४७ जना पदाधिकारीलाई बर्खास्त गर्ने निर्णय मन्त्रिपरिषदले गरेको हो ।

खेलकुदका पदाधिकारीको चार वर्ष र अस्पतालका पदाधिकारीको कार्यकाल तीनवर्षको हुने व्यवस्था सम्बन्धित ऐनमा छ । तर, कार्यकाल नसकिँदै खेलकुद मन्त्रालयको प्रस्तावमा खेलकुद समितिका पदाधिकारी र स्वास्थ्य मन्त्रालय तथा मन्त्रिपरिषदको कार्यालयले अस्पतालका पदाधिकारीलाई स्पष्टिकरण सोधेर हटाएको हो ।

युवा तथा खेलकुद मन्त्रालयले गत चैत ४ गते सम्बन्धित जिल्ला अध्यक्षहरुकै नाममा परिपत्र गर्दै स्पष्टीकरण पेश गर्न निर्देशन दिएको थियो । तत्कालीन मुख्यमन्त्री पृथ्वीसुब्बा गुरुङले प्रदेश खेलकुद विकास नियमावली नबन्दै विभिन्न जिल्लामा जिल्ला खेलकुद विकास समितिमा पदाधिकारीहरु नियुक्त गरेका थिए ।

उनीहरुको कार्य चित्तबुझ्दो नभएको भन्दै युवा तथा खेलकुद मन्त्रालयले स्पष्टीकरण माग गरेको थियो । मन्त्रालयले जिल्लाका अध्यक्षहरुलाई १५ दिनभित्र लिखित स्पष्टीकरण मागेको थियो । उक्त जवाफ चित्तबुझ्दो नभएको भन्दै मन्त्रिपरिषद बैठकले उनीहरुलाई हटाएको हो । गत वैशाख ५ गते जिल्ला खेलकुद विकास समितिमा पदाधिकारी नियुक्ति गरिएको थियो ।