संसदको अंकगणित फेरबदल नभएसम्म गठबन्धन कायम राख्न कांग्रेसले बचन दिएको छः खाँण

२५ चैत, म्याग्दी । नेपाली कांग्रेसका नेता एवं गृहमन्त्री बालकृष्ण खाँणले संसदको अंकगणितमा कुनै खास परिवर्तन नआएसम्म गठबन्धन कायम रहने बताएका छन् । उनले सरकारमा रहेका दलहरुलाई संसदीय गणितमा फेरबदल नहुन्जेल गठबन्त्रन कायम राख्ने बचन कांग्रेसले दिएको बताए ।

नेपाली कांग्रेस म्याग्दीले शुक्रबार बेनीमा आयोजना गरेको कार्यकर्ता भेटघाट कार्यक्रममा उनले वर्तमान सत्ता गठबन्धनले आगामी संघीय, प्रदेश र स्थानीय तहको निर्वाचन तीनै तहसम्म निरन्तरता पाउने बताए । गठबन्धनमा आबद्ध दललाई समेटेर साथसाथै लैजानुपर्ने धारणा कांग्रेसको रहेको खाँणको भनाई छ ।

मन्त्री खाँणले नेपालमा दिगो शान्ति, संविधान, लोकतान्त्रिक मूल्य पद्धतिको रक्षा गर्दै कांग्रेसलाई महत्वपूर्ण भूमिकामा फर्काउन गठबन्धन गरिएको भन्दै गठबन्धनप्रति पूर्ण विश्वास गर्न कार्यकर्तालाई आग्रह गरे । उनले खोलो तरेर लौरो बिर्सन नहुने बताए ।

उनले भने, ‘ गठबन्धनका लागि हामीले अन्य दललाई वचन दिएका छाँ । नदीमा बाढी आउँदा लौरेले खोला तर्ने अनी पारी तरेपछि लौरो बिर्सन हुँदैन । नयाँ चुनाव भएर संसद्को अंकगणित फेरबदल नहुँदासम्म गठबन्धन कायम रहन्छ । संसदमा साथै भएका दलसँगको सहकार्यलाई निरन्तरता र हातेमालो गरेर संविधान, मानवअधिकार, प्रेस स्वतन्त्रता र लोकतन्त्रको रक्षा गर्ने मुख्य कार्यभारतर्फ कार्यकर्ता लाग्नुपर्छ ।’

खाँणले आमाका नामबाट वंशजका आधारमा नागरिकता पाउने संवैधानिक व्यवस्था कार्यान्वयनका लागि नागरिकता ऐन बनाउन छलफलमा जुटेको पनि बताए । आमाका नामबाट नागरिकता नपाउँदा समस्यामा परेका बेनी नगरपालिका–७ का यास्मीन बेगम, समिर खान र सेनाज बेगमले उनलाई ज्ञापनपत्र बुझाएर ध्यानाकर्षण गराएकी थिइन् ।